07.10.2026 | 09:30
ՀՀ տարածքում ավտոճանապարհներն անցանելի են
ԱՄՆ-ն Ուկրաինայի համար նոր ռազմական պլան է մշակում․ The New York Times
Քաղաքականություն
12.12.2023 | 16:52
Այս ամառ ուկրաինական բանակի անհաջող հակահարձակումից հետո Միացյալ Նահանգները նոր ռազմական պլան է պատրաստում Ուկրաինայի համար։ Այս մասին հայտնում է The New York Times-ը՝ վկայակոչելով աղբյուրներին, փոխանում է DW-ի ռուսական ծառայությունը։
Նշվում է, որ դրա համար Ուկրաինա է ուղարկվում ամերիկացի գեներալ, որը «զգալի ժամանակ» կանցկացնի այնտեղ։ Հղում անելով ամերիկացի և ուկրաինացի զինվորականներին՝ լրատվամիջոցը հայտնում է նաև, որ մեկ ամսվա ընթացքում նոր ռազմավարության մանրամասները կմշակվեն մի շարք պատերազմական խաղերում, որոնք նախատեսվում է անցկացնել Գերմանիայի Վիսբադեն քաղաքում։
Վաշինգտոնը մտավախություն ունի, որ Կիևը կարող է պարտվել պատերազմում առանց նոր ռազմավարության և լրացուցիչ ֆինանսավորման։ Ամերիկացի պաշտոնյաների խոսքով՝ Ուկրաինայի զինված ուժերում և երկրի ղեկավարությունից շատերն անիրատեսական ակնկալիքներ ունեն ԱՄՆ-ի ռազմական մատակարարումների վերաբերյալ՝ խնդրելով «միլիոնավոր արկեր արևմտյան պահեստներից, որոնք գոյություն չունեն», և չեն գիտակցում, թե որքան «անկայուն է ԱՄՆ-ի կողմից պատերազմի հետագա ֆինանսավորումը»։
Ամերիկացի պաշտոնյաները կարծում են, որ Ուկրաինան ստիպված կլինի պայքարել ավելի սահմանափակ բյուջեով։ Նրանք նաև մտավախություն ունեն, որ առանց ռազմավարության փոփոխության՝ 2024 թվականը կարող է նմանվել 1916-ին՝ Առաջին համաշխարհային պատերազմի ամենամահաբեր տարվան, երբ հազարավոր մարդիկ զոհվեցին, իսկ ճակատային գիծը հիմնականում մնացել էր անփոփոխ:
Նշվում է, որ ամերիկացիները հավատարիմ են պահպանողական ռազմավարությանը, որի շրջանակում Ուկրաինան պետք է տարածքները պահպանի և 2024 թվականի ընթացքում սեփական արտադրության զարգացման միջոցով ուժեր ու սպառազինության պաշարներ կուտակի։ Ամերիկացի զինվորականների մի մասը կարծում է, որ այյդ ռազմավարությունը կբարելավի Կիևի ինքնաբավությունը, նրան անվտանգությամբ կապահովի և հնարավորություն կտա հետ մղել ռուսական ցանկացած նոր հարձակում։
«Նպատակը բավական իրական վտանգ ստեղծելն է, որ Ռուսաստանը հաջորդ տարեվերջին կամ 2025 թվականին մտածի բովանդակալից բանակցությունների մասնակցելու մասին»,- ամփոփում է NYT-ն։
Միաժամանակ, ուկրաինացիներն ուսումնասիրում են ռազմավարություն, որը հիմնված է ռուսական թիկունքում հարվածներ հասցնելու վրա, օրինակ՝ Ղրիմի թիրախների վրա հարձակումները։
Լրատվամիջոցի զրուցակիցները պատմել են, որ ուկրաինական կողմը փնտրում է Ռուսաստանին հավասարակշռությունից հանելու ստեղծագործական ուղիներ՝ զենքի գործարանների, պահեստների և զինամթերքով գնացքների վրա հարձակումների միջոցով։
Էմմա Չոբանյան
