Քաղաքականություն
12.12.2023 | 13:52
Վերջին մի քանի ժամվա ընթացքում տեղեկություններ են ստացվել Գազայի հատվածում շարունակվող ավիահարվածների և մարտերի, ինչպես նաև Հորդանան գետի արևմտյան ափին հարձակումների մասին, գրում է BBC-ի ռուսական ծառայությունը:
Պաղեստինյան WAFA լրատվական գործակալության փոխանցմամբ՝ Գազայի հատվածի հարավում Իսրայելն օդային հարվածներ է հասցրել Ռաֆահ քաղաքին։ Խան Յունիսում, որտեղ հարյուր հազարավոր Գազայի բնակիչներ էին ապաստանել, իսրայելական տանկերը շարժվել են դեպի քաղաքի կենտրոն։
AFP-ն հաղորդել է, որ «Իսլամական ջիհադ»-ի զինյալները պայթեցրել են Խան Յունիսում գտնվող տունը, որտեղ իսրայելցի զինվորները թունելի հորան էին փնտրում:
Իսրայելի պաշտպանության բանակը հայտնել է, որ իր մի քանի զինվորներ ծանր վիրավորվել են Գազայի հարավում։
Իսրայելը նաև շարունակում է հրետակոծել անկլավի հյուսիսային շրջանները, որտեղ, իսրայելցի զինվորականների պնդմամբ, պաշտպանության բանակը շրջապատել է ՀԱՄԱՍ-ի վերջին հենակետերը Ջաբալիայում և Շեջայայում:
Պաղեստինյան լրատվամիջոցները հաղորդում են նաև գիշերային արշավանքների և ձերբակալությունների մասին Հորդանան գետի Արևմտյան ափի մի քանի քաղաքներում: Պաղեստինյան տեղեկատվական կենտրոնի հրապարակած կադրերում երևում է, թե ինչպես են իսրայելցի զինվորները ներխուժում Հորդանան գետի արևմտյան ափին գտնվող Ջենին փախստականների ճամբար: Տեղեկություններ կան նաև այլ հարձակումների մասին։
