23.07.2026 | 19:33
Հուլիսին կնշանակվի ընկերության ժամանակավոր կառավարիչը․ Պապոյանն այցելել է «Արարատցեմենտ»
Բայրամովը հանդիպել է ԵՄ արտաքին քաղաքականության ղեկավարին
Քաղաքականություն
12.12.2023 | 11:22
Ադրբեջանի ԱԳ նախարար Ջեյհուն Բայրամովը Բրյուսելում նախօրեին հանդիպում է ունեցել Եվրամիության արտաքին հարաբերությունների և անվտանգության քաղաքականության հարցերով բարձր ներկայացուցիչ, ԵՄ հանձնաժողովի փոխնախագահ Ժոզեպ Բորելի հետ։
Ադրբեջանի ԱԳՆ-ն հայտնում է, որ քննարկվել են Եվրամիության և Ադրբեջանի երկկողմ հարաբերությունները, այդ թվում՝ Արևելյան գործընկերության շրջանակներում, ինչպես նաև տարածաշրջանում տիրող իրավիճակը:
Բայրամովը Բորելին տեղեկացրել է Ադրբեջանի և Հայաստանի միջև հարաբերությունների կարգավորման գործընթացի մասին։ Նշվել է, թե վստահության ամրապնդման վերջին միջոցառումները դրական ազդեցություն են ունեցել երկու երկրների հարաբերությունների կարգավորման գործընթացի վրա։
Բայրամովը նաև նշել է, որ Ադրբեջանը բարձր է գնահատում ԵԽ նախագահ Շառլ Միշելի միջնորդական ջանքերը կարգավորման գործընթացում։ Նա, այդուհանդերձ, հայտարարել է, թե «Եվրամիության որոշ պաշտոնյաների կողմից արված կողմնակալ հայտարարությունները խաթարում են գործընթացում ԵՄ-ի անաչառ միջնորդական դերը»։
Ադրբեջանի ԱԳՆ ղեկավարը կարծիք է հայտնել, որ Ադրբեջանի և Հայաստանի միջև ինքնիշխանության և տարածքային ամբողջականության փոխադարձ հարգանքի վրա հիմնված բարիդրացիական հարաբերությունների հաստատումը Հարավային Կովկասում խաղաղության, կայունության և հանգստության միակ ճանապարհն է։
Հանդիպման վերաբերյալ Բորելն էլ գրառում է արել X-ի իր էջում․
«Մտքերի լավ փոխանակում Ջեյհուն Բայրամովի հետ ԵՄ-Ադրբեջան համագործակցության ու ավելի լայն տարածաշրջանային համատեքստի վերաբերյալ։ Հարավային Կովկասում երկար սպասված խաղաղության հասնելու պատմական հնարավորություն կա. ԵՄ-ն լիովին հավատարիմ է մնում Հայաստան-Ադրբեջան հարաբերությունների կարգավորման գործընթացին աջակցելուն»։
Հիշեցնենք, որ օրերս Ադրբեջանի նախագահ Իլհամ Ալիևը վիրավորել էր Բորելին, Եվրախորհրդարանի նախագահ Ռոբերտա Մեցոլային՝ նրանց անվանելով «պոպուլիստներ»։
