08.04.2026 | 01:11
Խարբերդի ամառանոցներից դեպի Նուբարաշեն ավտոճանապարհին 5 մեքենա է բախվել. 3 անձ հոսպիտալացվել է
Մոսկվան ողջունում է Երևանի և Բաքվի համատեղ հայտարարությունը․ Զախարովա
Քաղաքականություն
08.12.2023 | 14:26
Ռուսական կողմը դրական է գնահատում հարաբերությունները կարգավորելու և խաղաղության պայմանագիր կնքելու մտադրության մասին Ադրբեջանի և Հայաստանի համատեղ հայտարարությունը։ Այս մասին ասվում է ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանության մեջ։
«Մոսկվայում գոհունակությամբ են ընդունել Ադրբեջանի նախագահի աշխատակազմի և Հայաստանի Հանրապետության վարչապետի աշխատակազմի համատեղ հայտարարությունը, որը հաստատում է հարաբերությունները կարգավորելու և երկու երկրների միջև խաղաղության պայմանագիր կնքելու փոխադարձ մտադրությունը»,- ասել է Զախարովան։
Նա նշել է, որ Մոսկվան պատրաստ է շարունակել հնարավոր աջակցություն ցուցաբերել տրանսպորտային հաղորդակցությունների ապաշրջափակման, սահմանի սահմանազատման, խաղաղության պայմանագրի կնքման և քաղաքացիական հասարակության միջոցով շփումների հարցում։
«Մենք ողջունում ենք Բաքվի ու Երևանի միջև ձեռք բերված համաձայնությունը հայ և ադրբեջանցի զինծառայողների ազատ արձակման վերաբերյալ»,- ասվում է հայտարարության մեջ։
Զախարովան նշել է, որ Ռուսաստանը հետևողականորեն առաջ է քաշել «բոլորը՝ բոլորի դիմաց» սկզբունքով ձերբակալվածներին փոխանակելու գաղափարը։ Ըստ նրա՝ «դա նպաստում է վստահության փոխադարձ ամրապնդմանը և նոր հնարավորություններ է բացում հայ-ադրբեջանական հարաբերությունների կարգավորման գործընթացի խթանման համար՝ Ռուսաստանի, Ադրբեջանի և Հայաստանի ղեկավարների՝ 2020-2022 թվականների եռակողմ հայտարարություններին համահունչ»։
«Մենք ողջունում ենք Երևանի որոշումը՝ որպես բարի կամքի դրսևորում հրաժարվելու իր երկրի թեկնածությունից՝ հօգուտ Ադրբեջանի՝ 2024 թվականի նոյեմբերին ՄԱԿ-ի Կլիմայի փոփոխության շրջանակային կոնվենցիայի (COP-29) համաժողովի անցկացման համար, ինչպես նաև Բաքվի կողմից ՄԱԿ-ի բյուրոյին անդամակցելու՝ Հայաստանի թեկնածությանն աջակցության մասին։ Ռուսական կողմը (ՌԴ նախագահի կլիմայի հարցերով հատուկ ներկայացուցիչ Ռուսլան Սաիդ-Խուսաինովիչ Էդելգերիևը) կապեր է ունեցել Բաքվի և Երևանի հետ՝ նպատակ ունենալով հասնել ՄԱԿ-ի ԿՓՇԿ-ի շուրջ ընդհանուր համաձայնության»,- ասվում է Զախարովայի մեկնաբանության մեջ։
Էմմա Չոբանյան
