Քաղաքականություն
08.12.2023 | 15:09
Ադրբեջանի նախագահ Իլհամ Ալիևը Բաքվում ընդունել է Եվրոպայի խորհրդի գլխավոր քարտուղար Մարիա Պեյչինովիչ-Բուրիչին։ Ադրբեջանական կողմի տարածած հաղորդագրության համաձայն՝ Մարիա Պեյչինովիչ-Բուրիչը նշել է, որ բարձր է գնահատում տարածաշրջանում կայուն խաղաղության ապահովման ուղղությամբ Ադրբեջանի ձեռնարկած քայլերը, Ադրբեջանի նախագահի աշխատակազմի և Հայաստանի վարչապետի աշխատակազմի կողմից ընդունված համատեղ հայտարարությունը և դրանից բխող խնդիրները, հատկապես երկու երկրների միջև վստահության ամրապնդմանն ուղղված քայլերը։
Նա ընդգծել է, որ Եվրոպայի խորհուրդը պատրաստ է նպաստել Ադրբեջանի և Հայաստանի միջև վստահության ամրապնդման գործընթացներին։
Ալիևն իր հերթին նշել է, որ տարիների ընթացքում Ադրբեջանի և Եվրոպայի խորհրդի միջև ձևավորվել է շատ սերտ համագործակցություն։ Նա նշել է, որ Ադրբեջանի նախագահի աշխատակազմի ու Հայաստանի վարչապետի աշխատակազմի համատեղ հայտարարությունը հանդիսանում է փոխադարձ քաղաքական կամքի ևս մեկ ցուցադրություն՝ նպաստելու փոխադարձ խաղաղության օրակարգին և կարգավորելու երկու երկրների հարաբերությունները։
Ադրբեջանի նախագահը նաև ընդգծել է, թե Եվրոպայի խորհուրդը նաև շատ լավ հարթակ է երկու երկրների միջև վստահության ամրապնդման գործընթացներին նպաստելու համար։
Զրույցի ընթացքում նշվել է ԵԽԽՎ-ում Ադրբեջանի և Հայաստանի խորհրդարանական պատվիրակությունների միջև հարաբերությունների և կառուցողական երկխոսության կարևորությունը։ Նշվել է, որ Ադրբեջանի և Եվրոպայի խորհրդի համագործակցությունը զարգանում է տարբեր ոլորտներում։
Էմմա Չոբանյան
