29.04.2026 | 18:50
Ժոզե Մոուրինյուն արձագանքել է «Ռեալ» վերադառնալու մասին լուրերին
ԲԴԽ անդամները հանդիպել են Միջազգային Իրավական Համագործակցության գերմանական հիմնադրամի ներկայացուցիչների հետ
Հասարակություն
08.12.2023 | 12:02
Բարձրագույն դատական խորհրդի անդամներ Նաիրա Հովսեփյանը, Քրիստինե Մկոյանը և Դատական դեպարտամենտի ղեկավարի տեղակալ Արշակ Վարդապետյանն ընդունել են աշխատանքային այցով ՀՀ-ում գտնվող Միջազգային Իրավական Համագործակցության գերմանական հիմնադրամի (IRZ) ներկայացուցիչներին՝ Հարավարևելյան Եվրոպայում և Հարավային Կովկասում իրականացվող ծրագրերի բաժնի ղեկավար Ֆրանկ Հուփֆելդին և հայաստանյան ծրագրերի համակարգող Նարինե Թումասյանին․ տեղեկացնում են ԲԴԽ-ից։
Հանդիպման ընթացքում Բարձրագույն դատական խորհրդի անդամները զրուցակիցներին ներկայացրել են դատական համակարգում վերջին տարիներին տեղի ունեցած բարեփոխումները, հատկապես, կարևորելով դատավորների գնահատման նոր համակարգի ներդրումը, որն էականորեն նպաստելու է երկրում արդարադատության որակի բարձրացմանը:
ԲԴԽ անդամները նշել են, որ գնահատման նոր համակարգը բացառելու է դատավորների առաջխաղացման գործընթացում սուբյեկտիվ գործոնի առկայությունը և օգնելու է դատավորին արդարացիորեն գնահատել ըստ իր կատարած աշխատանքի:
Հյուրերին է ներկայացվել նաև վերջին տարիներին կոռուպցիայի դեմ պայքարի նպատակով Հայաստանում ձևավորված նոր գործիքակազմերը՝ Հակակոռուպցիոն եռաստիճան մասնագիտացված դատարանի հիմնումը, Կոռուպցիայի կանխարգելման հանձնաժողովի դերը նոր դատավորների նշանակման հարցում, որն ինքնին զտիչ դեր ունի և կանխարգելում է բարեվարքության չափանիշներին չհամապատասխանող անձանց մուտքը դատական համակարգ։
Անդրադարձ է կատարվել նաև դատարաններ-հանրություն կապն ամրապնդելու նպատակով ստեղծվելիք հանրային կապերի պատասխանատուների ցանցին, հյուրերը ողջունել են նախաձեռնությունը և պատրաստակամություն հայտնել իրենց աջակցությունը ցուցաբերել գաղափարի կյանքի կոչման գործում։
Ի թիվս այլնի քննարկվել են նաև երկուստեք հետաքրքրություններ ներկայացնող այլ հարցեր:
Հյուրերը շնորհակալություն են հայտնել բովանդակալից զրույցի համար և պայմանավորվածություն ձեռք բերել շարունակական դարձնելու հանդիպումները:
