03.06.2026 | 16:01
Թրամփը հայտարարել է, որ կցանկանար հանդիպել Իրանի գերագույն առաջնորդ Մոջթաբա Խամենեիի հետ
ՌԴ-ում 8-րդ դասարանի աշակերտուհին դպրոցում կրակ է բացել․ մարդկային կորուստներ կան
Քաղաքականություն
07.12.2023 | 14:00
ՌԴ Բրյանսկ քաղաքում 8-րդ դասարանի աշակերտուհին կրակ է բացել դպրոցում։ Այս մասին գրում է ՏԱՍՍ-ը՝ օպերատիվ ծառայությունների իր աղբյուրին հղումով։ Նշվում է, որ հրաձգությունը տեղի է ունեցել թիվ 5 գիմնազիայում։
ՏԱՍՍ-ի զրուցակցի խոսքով՝ դեռահաս աղջիկը հրազեն է բերել դպրոց, որից մի քանի անգամ կրակել է։ Ըստ տեղեկությունների՝ զենքը պատկանել է աշակերտուհու հորը։
Բրյանսկի քաղաքային վարչակազմից հայտնում են, որ հրաձգության հետևանքով զոհվել է 2 մարդ, 4 վիրավոր կա։
Զոհերի թվում, նախնական տվյալներով, կարող է լինել հենց ողբերգական միջադեպի հեղինակ դեռահասը։ ՌԻԱ Նովոստիի աղբյուրի պնդմամբ՝ հրաձգությունն իրականացրած աշակերտուհին ինքնասպան է եղել։
Baza տելեգրամ ալիքի տվյալներով էլ՝ աշակերտուհին կրակ է բացել կենսաբանության դասի ժամանակ։ Նա բարձրացել է գիմնազիայի չորրորդ հարկ, մտել սենյակ ու սկսել կրակել։
Էմմա Չոբանյան
