15.01.2026 | 14:24
Կանադան ողջունել է Ադրբեջանի կողմից հայ գերիների ազատ արձակումը
ՄԱԿ-ի գլխավոր քարտուղարը զգուշացրել է Գազայում հումանիտար աղետի վտանգի մասին․ Իսրայելը պահանջել է նրա հրաժարականը
Քաղաքականություն
07.12.2023 | 14:26
ՄԱԿ-ի գլխավոր քարտուղար Անտոնիո Գուտերեշը կրկնել է Գազայի հատվածում մարդասիրական հրադադարի մասին իր կոչը։ Նա վկայակոչել է ՄԱԿ-ի կանոնադրության 99-րդ հոդվածը, որը թույլ է տալիս Անվտանգության խորհրդի ուշադրությունը հրավիրել «ցանկացած հարցի վրա, որը կարող է սպառնալ միջազգային խաղաղության և անվտանգության պահպանմանը»:
«Գազայում մարդասիրական համակարգի փլուզման լուրջ վտանգի առաջ կանգնելով՝ ես կոչ եմ անում Խորհրդին օգնել կանխել հումանիտար աղետը և հումանիտար հրադադարի կոչ անել»,- գրել է Գուտերեշը X սոցիալական ցանցում:
Նա հավելել է, որ 2017 թվականին գլխավոր քարտուղար դառնալուց հետո ինքը նման հայտարարությամբ առաջին անգամ է հանդես եկել։
ՄԱԿ-ի Անվտանգության խորհրդի նախագահին ուղղված նամակում Գուտերեշն ընդգծել է, որ իրավիճակը Գազայում արագորեն վատթարանում է, ինչը կարող է անդառնալի հետևանքներ ունենալ պաղեստինցիների և ամբողջ տարածաշրջանի անվտանգության համար։
BBC-ի ռուսական ծառայության փոխանցմամբ՝ ՄԱԿ-ում Իսրայելի դեսպան Գիլադ Էրդանը զայրույթով է արձագանքել ՄԱԿ-ի գլխավոր քարտուղարի՝ Գազայում մարդասիրական հրադադար հաստատելու կոչին և կրկնել նրա հրաժարականի կոչը:
«Այսօր գլխավոր քարտուղարը բարոյական անկման նոր մակարդակի է հասել»,- հայտարարել է Էրդանը:
Նա հավելել է, որ հրադադարի կոչն «իրականում ՀԱՄԱՍ-ին ուղղված կոչ է՝ շարունակելու իր ահաբեկչական իշխանությունը Գազայում»։
