07.10.2026 | 12:10
Փաշինյանը՝ ադրբեջանցի զինվորին Բաքվին հանձնելու մասին // ՌԴ-ում ԱՄՆ դեսպանատունը տագնապ է տարածել․ ԼՈՒՐԵՐ
Իսրայելը թանկ կվճարի, եթե Թուրքիայում թիրախավորի ՀԱՄԱՍ-ի անդամներին․ Էրդողան
Քաղաքականություն
06.12.2023 | 21:23
Թուրքիայի նախագահ Ռեջեփ Թայիփ Էրդողանն Իսրայելին զգուշացրել է՝ զերծ մնալ պաղեստինյան ՀԱՄԱՍ շարժման անդամների ֆիզիկական ոչնչացման ծրագրերի իրականացումից, այդ թվում՝ Պաղեստինից դուրս, գրում է Անադոլու գործակալությունը։
«Եթե նրանք համարձակվեն նման բան անել Թուրքիայում, ապա թանկ գին կվճարեն, որից չեն կարողանա վերականգնվել։ Աշխարհում բոլորը գիտեն, թե ինչ առաջընթաց է արձանագրել Թուրքիան հետախուզության և անվտանգության ոլորտում։ Ոչ ոք չպետք է մոռանա այս մասին»,- ասել է Էրդողանը՝ Կատարից վերադառնալիս ինքնաթիռում պատասխանելով լրագրողների հարցերին։
Նրա խոսքով՝ արևմտյան երկրների, առաջին հերթին՝ ԱՄՆ-ի կողմից Իսրայելին ցուցաբերվող աջակցությունը հանգեցրել է մերձավորարևելյան տարածաշրջանի ներկայիս բարդ իրավիճակին։
«Եթե չլիներ ԱՄՆ-ի գլխավորությամբ արևմտյան երկրների կողմից Իսրայելի աջակցությունը, մենք նման իրավիճակի հետ չէինք բախվի տարածաշրջանում»,- ասել է Թուրքիայի նախագահը։
Նա նաև նշել է, որ Իսրայելի կողմից պաղեստինյան հողերի օկուպացիայի ծրագիրը, որն իրականացվում է 1947 թվականից, Պաղեստինն ու Գազայի հատվածը հասցրել է ներկայիս վիճակին։ Էրդողանը վստահություն է հայտնել, որ Իսրայելի վարչապետ Բենիամին Նեթանյահուն չի կարողանա խուսափել պատժից Գազայի հատվածում իր գործողությունների համար։ Ըստ նրա՝ «Նեթանյահուն կործանման եզրին է»։
Էրդողանը, միաժամանակ, ընդգծել է, որ Գազայի հատվածը «պատկանել է և պատկանելու է պաղեստինցիներին»։
Պաղեստինյան խնդրի լուծման հեռանկարների վերաբերյալ նա նշել է, որ Թուրքիան պատրաստ է խաղաղության համաժողով անցկացնել իսրայելա-պաղեստինյան հակամարտության վերաբերյալ և հանդես գալ որպես երաշխավոր երկիր։
Հավելենք, որ Անկարան ՀԱՄԱՍ-ն ահաբեկչական կազմակերպություն չի ճանաչում ու բավական սերտ կապեր ունի դրա ղեկավարության հետ, որոնք հաճախ են այցելում Թուրքիա և հանդիպում Էրդողանին։ Ըստ տեղեկությունների՝ ՀԱՄԱՍ-ի անդամներից ոմանք ունեն նաև Թուրքիայի քաղաքացիություն։
Էմմա Չոբանյան
