19.09.2024 | 23:29
ԵԽ Նախարարների կոմիտեն Թուրքիայի կողմից ստանձնած պարտավորությունները չկատարելու վեց դեպք կքննարկի
Ադրբեջանի պետական գործակալության լրագրողը ձերբակալվել ու վտարվել է ֆրանսիական Նոր Կալեդոնիայից
Քաղաքականություն
06.12.2023 | 12:02
Ադրբեջանի պետական AZERTAC լրատվական գործակալության լրագրող Այգյուն Հասանովային արգելել են մուտք գործել Խաղաղ օվկիանոսում գտնվող ֆրանսիական Նոր Կալեդոնիա տարածք։ Ադրբեջանական գործակալությունը իր տարածած հայտարարության մեջ նշում է, որ գործուղված լրագրողի մուտքը արգելվել է, թեպետ նա ունեցել է վիզա։ Բացի այդ՝ նրան մեկ օր պահել են ոստիկանական բաժանմունքում և որպես «անցանկալի անձ» վտարել երկրից։
Գործակալության հայտարարության մեջ նշվում է, թե «ֆրանսիական պետությունը ամեն կերպ փորձում է սահմանափակել Նոր Կալեդոնիայում և ֆրանսիական այլ գաղութներում ակտիվացող ազատության և անկախության համար պայքարի մասին փաստերի տարածումը և որ ադրբեջանցի լրագրողի մուտքի արգելք է դրվել դեկտեմբերի 5-ին նախատեսված հանրահավաքի նախօրեին»։
Նշենք, որ Ադրբեջանը պետական մակարդակով իրականացնում է հակաֆրանսիական արշավ, որի շրջանակներում 2023 թվականի հուլիսի 6-ին ստեղծվել է Բաքվի նախաձեռնող խումբը։ Այն իրականացնում է հակաֆրանսիական տարբեր միջոցառումներ։
Վերջերս էլ Ադրբեջանի մայրաքաղաքում խմբի նախաձեռնությամբ անցկացվել էր «Նեոգաղութատիրություն. մարդու իրավունքների խախտում և անարդարություն» միջազգային համաժողովը Ֆրանսիայի դեմ։ Միջոցառմանը մասնակցել էին 14 երկրների, ինչպես նաև Ֆրանսիայի և Կորսիկայի անդրծովյան տարածքների որոշ ներկայացուցիչներ, որոնց Բաքուն սկսել է ակտիվորեն ֆինանսավորել։ Համաժողովին հակաֆրանսիական ելույթներ էին ունեցել նաև Ադրբեջանի տարբեր պաշտոնյաներ։
Էմմա Չոբանյան
