Քաղաքականություն
05.12.2023 | 18:50
Հավաքական անվտանգության պայմանագրի կազմակերպության (ՀԱՊԿ) անդամ երկրները ներկայացրել են նոյեմբերի 23-ին Մինսկում անցկացված գագաթնաժողովի արդյունքներով ընդունված հռչակագիրը։ Փաստաթղթում ընդգծվում է ռազմական դաշինքի անդամների պարտավորությունը՝ զերծ մնալ ուժի կիրառումից ու իրենց և այլ պետությունների միջև բոլոր տարաձայնությունները խաղաղ ճանապարհով լուծելու մտադրությունը։
«Մենք՝ ՀԱՊԿ Հավաքական անվտանգության խորհրդի անդամներս, մտահոգություն ենք հայտնում աշխարհում լարվածության շարունակական սրման կապակցությամբ։ Մենք վերահաստատում ենք մեր հանձնառությունը՝ զերծ մնալու միջպետական հարաբերություններում ուժի կամ ուժի սպառնալիքի կիրառումից ու մեր և այլ պետությունների միջև բոլոր տարաձայնությունները լուծելու խաղաղ ճանապարհով»,- ասված է հռչակագրում։
Դրանում նաև հակիրճ անդրադարձ կա Հարավային Կովկասում ստեղծված իրավիճակին։
«Մեր աջակցությունն ենք հայտնում Հարավային Կովկասում խաղաղության և կայունության հասնելու ջանքերին»,- ասված է հայտարարության մեջ։
ՀԱՊԿ անդամները նաև մտահոգություն են հայտնել «միջազգային հարաբերություններում դաշինքային առճակատման մտածելակերպին վերադարձի» և միջուկային ներուժ ունեցող պետությունների միջև անմիջական բախման աճող ռիսկերի առնչությամբ։
«Այս առումով մենք նշում ենք անվտանգության երկարաժամկետ և իրավաբանորեն պարտադիր երաշխիքների մշակման պարամետրերի և սկզբունքների շուրջ համաձայնությունների ձեռքբերման կարևորությունը»,- ընդգծվում է փաստաթղթում։
ՀԱՊԿ-ը նշել է, որ զինված հակամարտությունների կարգավորումը հնարավոր է միայն այն դեպքում, եթե անվտանգության ոլորտում երկրների շահերը հաշվի առնվեն ՄԱԿ-ի կանոնադրության և միջազգային իրավունքի սկզբունքների վրա հիմնված միջոցառումների միջոցով։
«Մենք վերահաստատում ենք մեր հանձնառությունը՝ ամրապնդելու հավասար և փոխշահավետ միջազգային պայմանագրերի համակարգը սպառազինությունների վերահսկման, զինաթափման և զանգվածային ոչնչացման զենքերի չտարածման ոլորտներում՝ միջազգային խաղաղությունն ու անվտանգությունը պահպանելու համար»,- ասվում է հռչակագրում։
Դրանում որպես ՀԱՊԿ-ի գործունեության առանցքային ուղղություններից նշվում է կազմակերպության անդամ երկրների պաշտպանունակության ամրապնդումը, ինչպես նաև զինված ուժերի պատրաստվածության պահպանումը։ Բացի այդ, փաստաթուղթը մատնանշում է միջազգային ահաբեկչության և ծայրահեղականության, թմրամիջոցների ապօրինի շրջանառության և անօրինական միգրացիայի դեմ պայքարի անհրաժեշտությունը։
