24.06.2026 | 20:24
Անկարայում ՆԱՏՕ-ի գագաթնաժողովից առաջ ԻԼԻՊ-ի հետ կապված կասկածյալ է սպանվել
Ադրբեջանն ու ԵՄ-ն պայմանավորվել են թարմացնել ռազմավարական էներգետիկ գործընկերության ճանապարհային քարտեզը
Քաղաքականություն
04.12.2023 | 20:14
Ադրբեջանի էներգետիկայի նախարար Փարվիզ Շահբազովն Արաբական Միացյալ Էմիրություններ կատարած այցի ընթացքում ՄԱԿ-ի Կլիմայի փոփոխության շրջանակային կոնվենցիայի COP28 կոնֆերանսի միջոցառումների շրջանակում հանդիպել է ԵՄ էներգետիկ հարցերով հանձնակատար Կադրի Սիմսոնի հետ, գրում են ադրբեջանական լրատվամիջոցները։
Նշվում է, որ հանդիպմանը քննարկվել են Հարավային գազային միջանցքի ընդլայնման, «Համերաշխության օղակ» նախաձեռնության և Կասպից ծով-Սև ծով-Եվրոպա կանաչ էներգետիկ միջանցքի իրականացման հարցեր:
Հանդիպմանը շոշափվել են նաև Ադրբեջանի և Եվրամիության միջև էներգետիկ երկխոսության այլ ասպեկտներ, պայմանավորվածություն է ձեռք բերվել թարմացնել ռազմավարական էներգետիկ գործընկերության փաստաթղթի իրականացման ճանապարհային քարտեզը։
«ԱՄԷ-ում ԵՄ էներգետիկայի հարցերով հանձնակատար Կադրի Սիմսոնի հետ հանդիպման ժամանակ մենք արդյունավետ քննարկումներ ունեցանք Հարավային գազային միջանցքի և Կանաչ էներգետիկ միջանցքի, ինչպես նաև մեր էներգետիկ երկխոսության այլ առաջնահերթությունների վերաբերյալ: Պայմանավորվեցինք թարմացնել Ադրբեջան-ԵՄ ռազմավարական էներգետիկ գործընկերության իրականացման ճանապարհային քարտեզը»,- գրել է Շահբազովը սոցցանցերի իր էջում։
Հիշեցնենք, որ Ադրբեջանն ու ԵՄ-ն 2022 թվականի հուլիսի 18-ին էին փոխըմբռնման հուշագիր ստորագրել էներգետիկ ոլորտում առաջիկա հինգ տարիների ռազմավարական գործընկերության վերաբերյալ։ Փաստաթուղթը ստորագրել էին Ադրբեջանի նախագահ Իլհամ Ալիևը և Եվրահանձնաժողովի ղեկավար Ուրսուլա ֆոն դեր Լեյենը։
Էմմա Չոբանյան
