16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Սամվել Ալեքսանյանն իշխանափոխությունից հետո նվազեցրել է ՊՆ-ին մատակարարվող շաքարավազի գինը՝ 320 դրամից դարձնելով 285 դրամ
Տնտեսություն
30.07.2018 | 20:00
«Ալեքս Հոլդինգ» ընկերության դիմումով վերանայվել է այս տարվա մարտ ամսին Պաշտպանության նախարարության հետ կնքած պայմանագիրը, որով ընկերությունը շաքարավազ է մատակարարում նախարարարությանը: Այս մասին Factor.am-ին տեղեկացրեց Հանրային քաղաքականության հետազոտությունների ազգային կենտրոնի նախագահ, տնտեսագետ Արտակ Մանուկյանը:
Ազգային ժողովի պատգամավոր Սամվել Ալեքսանյանի հետ առնչվող այս ընկերույթունը ՊՆ-ի հետ հետ կնքել է 203 մլն 672 հազար 320 դրամի պայմանագիր՝ պարտավորվելով մատակարարել 636 հազար 476 կգ շաքարավազ՝ կլիոգրամը 320 դրամով; Իշխանափոխությունից հետո, սակայն, Ալեքսանյանի անվան հետ փոխկապակցված այդ ընկերությունը վերանայել է գնային քաղաքականությունը և մոտ 12 տոկոսով նվազեցրել է շաքարավազի գինը՝ նախկին 320 դրամի փոխարեն դարձնելով 285 դրամ: Տնտեսագետ Արտակ Մանուկյանի խոսքով՝ այս ամենը վկայում է այն մասին, որ այդ և նմանատիպ այլ ընկերություններ տարիներ շարունակ գերշահույթ են ստացել:
Մանուկյանը նկատում է՝ թեև համաշխարհային շուկայում շաքարավազի գները նվազել են, այդուհանդերձ նախկինում նման իջեցնումններն աննկատ էին մնում: «Գների վերանայման քայլով Ալեքսանյանը ցանկանում է ցույց տալ, որ եկել են նոր ժամանակներ, ուր գնագոյացումը համապատասխանելու է արդար գնագոյացման ոգուն: Պետք է հասնել նրան, որ գնագոյացման հիմքում ընկած լինեն շուկայական հարաբերությունները, ինչում կարևոր դերակատարում ունի ՏՄՊՊՀ»,- մանրամասեց տնտեսագետը:
Նշենք, որ այսօր վարչապետ Նիկոլ Փաշինյանի մոտ անցկացված խորհրդակցության ժամանակ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանն անդրադարձել է շաքարավազի գներին և մասնավորապես նշել, որ մինչև վերջերս Հայաստանում շաքարավազի հիմնական ապահովողը եղել է մեկ ընկերություն, սակայն վերջին երկու ամիսների ընթացքում շաքարավազ ներմուծող տնտեսվարող ընկերություններն ու շաքարավազի ներկրման խմբաքանակներն էապես ավելացել են: Ոլորտում ստեղծված մրցակցության արդյունքում տեղի է ունենում շաքարավազի գնի նվազում: Ներկա դրությամբ շաքարավազի մեկ կիլոգրամն արժե 285 դրամ՝ տարեսկզբի 390 դրամի համեմատ, այսինքն գինը նվազել է 26 տոկոսով:
Շողիկ Գալստյան
