ԱՄՆ-ը ճնշում է Թուրքիային՝ դադարեցնելու աջակցությունը ՀԱՄԱՍ-ին և Ռուսաստանին

ԱՄՆ գանձապետարանի ահաբեկչության ֆինանսավորման վարչության պաշտոնյան հայտարարել է, որ թուրքական կառավարության պաշտոնյաների հետ քննարկել է իր խորը մտահոգությունը պաղեստինյան զինյալ ՀԱՄԱՍ խմբավորման կողմից Թուրքիայում միջոցներ հավաքելու և տեղական օրենքները խախտելու հնարավորության վերաբերյալ, գրում է  Reuters-ը։

Ահաբեկչության դեմ պայքարի և ֆինանսական հետախուզության հարցերով ֆինանսների նախարարի տեղակալ Բրայան Նելսոնը նշել է, որ Թուրքիան «նշանակալի» դեր ունի ՀԱՄԱՍ-ի ֆինանսավորման սխեմաներում, և խումբը, հավանաբար, կօգտվի դրանից, քանի որ ավելի շատ գումար է փնտրում Իսրայելի հետ պատերազմի ժամանակ:

«Մենք խորապես մտահոգված ենք ՀԱՄԱՍ-ի՝ միջոցներ հայթայթելու և ֆինանսական աջակցություն գտնելու (այստեղ՝ Թուրքիայում) հարցով՝ հնարավոր ահաբեկչական հարձակումների համար»,- ասել է Նելսոնը Ստամբուլում լրագրողներին։

Թուրքիայի ԱԳՆ-ն անմիջապես չի արձագանքել լրատվամիջոցին մեկնաբանության խնդրանքին։

Թուրքիան ՀԱՄԱՍ-ը չի համարում ահաբեկչական կազմակերպություն, պարբերաբար հյուրընկալում է նրա անդամներին։ Նախագահ Թայիփ Էրդողանն էլ ՀԱՄԱՍ-ի զինյալներին անվանել է «ազատամարտիկներ», միաժամանակ քննադատել Իսրայելին՝ նրան անվանելով «ահաբեկչական պետություն»։

Նելսոնն ասել է, որ Թուրքիան կապված է եղել ՀԱՄԱՍ-ի նախկին ջանքերի հետ՝ միջոցներ հայթայթելու դոնորներից, ներդրումային պորտֆելներից, բարեգործական և ոչ առևտրային կազմակերպություններից:

«Թուրքիան բավարար հնարավորություն ունի լուծելու այս խնդիրը իր ներքին իրավական իրավազորության ներքո՝ անկախ ԱՄՆ պատժամիջոցներից»,- ասել է նա՝ նշելով, որ թուրք պաշտոնյաներն իրեն հիշեցրել են, որ ՀԱՄԱՍ-ը երկրում ահաբեկչական կազմակերպություն չի համարվում, բայց նաև այն, որ Թուրքիան չի հանդուրժի ներքին օրենքների խախտումը, ներառյալ՝ փողերի լվացումը և բռնի գործողությունների ուղղակի ֆինանսավորումը:

ԱՄՆ-ն ասում է, որ ՀԱՄԱՍ-ի ներդրումների պորտֆելը, որը գնահատվում է հարյուր միլիոնավոր դոլարների չափով, ներառում է ընկերություններ, որոնք գործում են Թուրքիայում, Սուդանում, Ալժիրում, Արաբական Միացյալ Էմիրություններում և այլուր:

Նելսոնը նաև բարձրացրել է ԱՄՆ-ի կողմից ավելի շատ պատժամիջոցների կիրառման հեռանկարի հարցը թուրքական կազմակերպությունների նկատմամբ, որոնց կասկածում են Ռուսաստանին օգնելու համար՝ խուսափելու պատժամիջոցներից՝ տարանցիկ փոխադրելով ապրանքներ, այդ թվում՝ չիպեր, կիսահաղորդիչներ և այլ բաղադրիչներ:

Վերջին 18-24 ամիսներին վեց անգամ ավելացել է Թուրքիայի տարածքով «բարձր առաջնահերթ երկակի նշանակության» բաղադրիչների տարանցումը դեպի Ռուսաստան:

«Թուրքիայի նավահանգիստներում և օդանավակայաններում չափազանց շատ ռուսական նավեր և ինքնաթիռներ են սպասարկվում։ Մենք չենք ստանում այն արդյունքները, որ ցանկանում ենք Ուկրաինային աջակցության (Թուրքիայի կողմից) շատ անկեղծ արտահայտման համատեքստում»,- ասել է Նելսոնը։

Անկարան նշում է, որ պատժամիջոցները չեն շրջանցվի իր տարածքում, և որ ոչ մի տարանցիկ ապրանք չի օգտագործվում Ռուսաստանի պատերազմական ջանքերում:

Էմմա Չոբանյան