ՊՆ գնումներում հաղթող որոշ ընկերություններ Զինծառայողների ապահովագրության հիմնադրամին գումար չեն փոխանցել. տնտեսագետն ուշագրավ բացահայտումներ է ներկայացնում

2017-2018 թվականների պաշտպանական ոլորտի գնումների մոնիթորինգի արդյունքների ուսումնասիրության արդյունքում կոռուպցիոն ռիսկեր են հայտնաբերվել մրցույթը շահած մի շարք կազմակերպությունների գործելաոճում: Factor.am-ի հետ զրույցում Հանրային քաղաքականության հետազոտությունների ազգային կենտրոնի նախագահ, տնտեսագետ Արտակ Մանուկյանը հայտնեց, որ ուսումնասիրությունն իրականացնելիս օգտվել են բացառապես բաց տվյալներից: Տնտեսագետի ներկայացրած տվյալներով՝ 2017 թվականին կնքվել է շուրջ 766 պայմանագիր, որոնց արժեքը կազմում է մոտավորապես 32 միլիարդ դրամ: 2018 թվականի առաջին կիսամյակում ավելի քան 25 միլիարդ դրամի գեներացված պարտավորություն կա, որը ձևավորվել է 539 պայմանագրի արդյունքում: Դրանց ուսումնասիրությունից պարզ է դարձել, որ հաղթող 270 ընկերություններից տասին բաժին է ընկնում Պաշտպանության նախարարության ողջ ձեռքբերումների 60 տոկոսը:

Արտակ Մանուկյանը ուշադրություն է հրավիրում այն հանգամանքի վրա, որ ընկերությունների գրեթե 80 տոկոսը Պաշտպանության նախարարությանն է ապրանք մատակարարում:

Հանրային քաղաքականության հետազոտությունների ազգային կենտրոնը ևս մեկ ուշագրավ ուսումնասիրություն է իրականացրել՝ պարզելու համար, թե ինչ քանակի աշխատողներ են հայտարարագրել պետական գնումներում հաղթող ընկերությունները, օգտվել են Զինծառայողների ապահովագրության հիմնադրամի տվյալներից՝ տեղադրելով այդ կայքում հարկ վճարողի հաշվառման համարները (ՀՎՀՀ): Ուսումնասիրությունից պարզ է դարձել, որ թե՛ խոշոր, թե ՛մանր մի շարք ընկերությունների դեպքում չկան գրանցված աշխատողներ:

Տնտեսագետ Արտակ Մանուկյանը տեղեկացնում է նաև, որ կան ընկերություններ, որոնց գործունեությունը թեև դադարեցված է, սակայն ՊՆ-ն շարունակում է այդ ընկերությունների հետ պայմանագիր կնքել: Մանուկյանն ասաց, որ պատրաստվում են ուսումասիրությամբ ձեռք բերված տվյալները փոխանցել համապատասխան մարմիններին՝ ակնկալելով այդ ուղղությամբ գործուն քայլեր։

Մանրամասները՝ տեսանյութում: