07.10.2026 | 23:48
Արթուր Դանիելյանը կալանավորվեց
Իսրայել է վերադարձել ևս 12 պատանդ
Քաղաքականություն
29.11.2023 | 13:35
Իսրայելի պաշտպանության բանակը (IDF) հայտարարել է հոկտեմբերի 7-ի հարձակման ժամանակ ՀԱՄԱՍ-ի գրոհայինների կողմից առևանգված ևս 12 պատանդների երկիր վերադարձի մասին։ Ըստ այդ տեղեկությունների՝ հայրենիք են վերադարձել 10 իսրայելցիներ և երկու օտարերկրյա քաղաքացիներ։
Գերմանիայի արտաքին գործերի նախարար Աննալենա Բերբոքը սոցցանցում գրել է, որ ազատ արձակված պատանդների թվում կա Գերմանիայի քաղաքացիություն ունեցող մի կին, հաղորդում է DW-ի ռուսական ծառայությունը։
Իսրայելի իշխանությունները բանտից ազատ են արձակել ևս 30 պաղեստինցի բանտարկյալների՝ պատանդների մեկ այլ խմբի փոխանցման դիմաց, հայտնում է Իսրայելի բանտերի վարչությունը։ Նրանց թվում են 15 կին և 15 անչափահաս, հայտնել է Կատարի ԱԳՆ պաշտոնական ներկայացուցիչ Մաջիդ բեն Մուհամմեդ ալ-Անսարին։
Հիշեցնենք, որ Իսրայելը և Գազայի հատվածը կառավարող պաղեստինյան ՀԱՄԱՍ շարժումը Կատարի միջնորդությամբ նոյեմբերի 22-ին պայմանավորվածություն ձեռք բերեցին չորս օրով դադարեցնել ռազմական գործողությունները՝ միմյանց մոտ պահվող տասնյակ պատանդների փոխանակման նպատակով։
Քառօրյա զինադադարը սկսվել է նոյեմբերի 24-ին տեղական ժամանակով ժամը 07.00-ին: Երեկ նոր համաձայնություն է ձեռք բերվել այն ևս երկու օրով երկարաձգելու վերաբերյալ։
