«Հրապարակի շենքերը կուսական վիճակում չեն եղել». փոխքաղաքապետը պնդում է` իրենց բացած անցքերը լցրել են. ՏԵՍԱՆՅՈՒԹ

Հանրապետության հրապարակի հուշարձան-շենքերի վրա բացված անցքերը զայրացրել են ճարտարապետ Գևորգ Բալյանին․ Factor TV-ն անցքերի հետ կապված պարզաբանում էր խնդրել Երևանի փոխքաղաքապետ Սուրեն Գրիգորյանից և նկարահանում էր իրականացնում հրապարակում, երբ ճարտարապետը, որը պատահաբար անցնում էր այդ տարածքով, ասաց՝ այլանդակություն է, բացահայտե՛ք կատարվածը։

Մինչ այդ, փոխքաղաքապետը մեզ վստահեցնում էր, որ պատմամշակութային արժեք ունեցող շենքերի անցքերը կապ չունեն անցյալ տարվա ամանորյա լուսավորության նախագծի հետ, դրանք եղել են դեռ 2016 թվականից և երևում են անգամ Yandex-ի քարտեզի վրա։ Գրիգորյանը Բալյանին էլ պարզաբանեց, որ իրենց բացած անցքերը լցրել են, ճարտարապետն էլ հակադարձեց՝ իր համար կապ չունի, թե ով է արել, կարևորը շենքի ճարտարապետական տեսքը պահպանելն է։

Ճարտարապետ Սաշուր Քալաշյանն էլ հաստատում է՝ հրապարակի շենքերի վրա անցքեր եղել են, բայց դա չի նշանակում, որ այդ մոտեցումը ճիշտ է։

Եթե անգամ քաղաքապետարանի նախաձեռնությամբ չեն բացվել այդ անցքերը  և եղել են, այսպես ասած, նախկինների օրոք, ինչո՞ւ կապալառու կազմակերպությունը՝ «Սինեմարտ» ՍՊԸ-ն, իր բացած անցքերը փակելու ժամանակ չի փակել նաև արդեն իսկ եղածները։ Փոխքաղաքապետ Սուրեն Գրիգորյանի խոսքով՝ նման պարտավորություն չի ստանձնել ընկերությունը։ Շենքերի ռեստավրացիան, ըստ փոխքաղաքապետի, պիտի իրականացնեն ԿԳՄՍՆ-ն ու Կառավարությունը։ Ի դեպ, երբ 2022-ին լուսավորությունն անցկացվում էր և շենքերի վրա անցքեր արդեն բացվել էին, պարզ դարձավ, որ ԿԳՄՍՆ-ի գիտամեթոդական նիստում հարցը չէր էլ քննարկվել։

Անցյալ տարի ճարտարապետական համայնքը վանդալիզմ էր որակել տոնական լույսերն ամրացնելու համար հուշարձան-շենքերի վրա անցքեր բացելը, քաղաքապետարանը, մինչդեռ, դա միջամտություն էր որակել։  Չնայած հանրային լայն դժգոհություններին՝ այս տարի ևս լույսերը կախվելու են նույն մեթոդով։ Այս անգամ, ասում են, մասնագետների կարծիքով են առաջնորդվել, ԿԳՄՍՆ գիտամեթոդական նիստում հարցը քննարկվել և հավանության է արժանացել։ Բացի այդ, այս տարի, ըստ փոխքաղաքապետի, լուսավորություն անցկացնելու համար կտեղադրվեն մետաղական կոնստրուկցիաներ, որոնք ավելի քիչ միջամտություն կպահանջեն:

Ճարտարապետ Սաշուր Քալաշյանը, որն անցյալ տարի կոշտ քննադատում էր քաղաքապետարանի նախագիծը, այս տարի ևս նշում է, որ դա անթույլատրելի ու անընդունելի է․ «Դա մշակութային բարբարոսություն է»,- ասում է ճարտարապետը։

Ի դեպ, այս տարի տոնական ձևավորումն իրականացնող ընկերությունը 2008-ին հիմնադրված և միայն Երևանի քաղաքապետարանի հետ համագործակցած «Սինեմարտ» ընկերությունն է, որն ինչպես անցյալ տարի, այս տարի ևս ծառայություն է մատուցում առանց մրցույթի։ «Սինեմարտ» ընկերությունից պարզաբանում են, որ ընտրվել են բացառիկ փորձի համար։

Մանրամասները՝ տեսանյութում։

Արփի Հակոբյան