Ուկրաինան և Բալթյան երկրները ՌԴ-ի մասնակցության պատճառով բաց կթողնեն ԵԱՀԿ գագաթնաժողովը

Ուկրաինայի, Լատվիայի, Լիտվայի և Էստոնիայի պատվիրակությունները չեն մասնակցի Եվրոպայի անվտանգության և համագործակցության կազմակերպության (ԵԱՀԿ) Նախարարների խորհրդի նիստին՝ գագաթնաժողովին ռուսական պատվիրակության մասնակցության պատճառով։ Այս մասին ֆեյսբուքյան իր էջում գրել է Ուկրաինայի ԱԳՆ պաշտոնական ներկայացուցիչ Օլեգ Նիկոլենկոն, գրում է DW-ի ռուսական ծառայությունը։

Ուկրաինայի ԱԳՆ ներկայացուցիչը Ռուսաստանին մեղադրել է «ԵԱՀԿ-ն հետևողականորեն ոչնչացնելու մեջ»։

«Դիմելով շանտաժի և բացահայտ սպառնալիքների՝ Ռուսաստանի Դաշնությունը համակարգված կերպով արգելափակեց կոնսենսուսն առանցքային հարցերի շուրջ»,- ընդգծել է Նիկոլենկոն՝ հիշեցնելով 2024 թվականին ԵԱՀԿ-ում Էստոնիայի նախագահությունը Ռուսաստանի կողմից արգելափակելու մասին։

«Ռուսաստանն անօրինական կերպով ձերբակալել է երեք ուկրաինացիների՝ ԵԱՀԿ-ի ներկայացուցիչների, որոնք բանտում են գտնվում ավելի քան 500 օր»,- հավելել է Նիկոլենկոն։

Ուկրաինայի ԱԳՆ ներկայացուցչի խոսքով՝ նման պայմաններում Ռուսաստանի պատվիրակության ներկայությունը գագաթնաժողովին «միայն կսրի այն ճգնաժամը, որի մեջ Ռուսաստանը մղել է ԵԱՀԿ-ին»։

«Այս պատճառով ուկրաինական պատվիրակությունը չի մասնակցի ԵԱՀԿ նախարարների հանդիպմանը արտգործնախարարի մակարդակով։ Միևնույն ժամանակ, Ուկրաինան հավատարիմ է մնում ԵԱՀԿ սկզբունքներին և պատրաստ է շարունակել աշխատանքը գործընկերների հետ»,- գրել է Ուկրաինայի ԱԳՆ ներկայացուցիչը։

Համատեղ հայտարարության մեջ Լատվիայի, Լիտվայի և Էստոնիայի ԱԳ նախարարներն էլ նշել են, որ Ռուսաստանի մասնակցությունը գագաթնաժողովին «վտանգում է լեգիտիմացնել ագրեսոր Ռուսաստանին՝ որպես ազատ ազգերի մեր համայնքի օրինական անդամի», ինչպես նաև «նսեմացնել Ռուսաստանի կողմից կատարվող դաժան հանցագործությունները»:

Հիշեցնենք, որ նոյեմբերի 30-ից դեկտեմբերի 1-ը Հյուսիսային Մակեդոնիայում տեղի կունենա ԵԱՀԿ ԱԳ նախարարների հանդիպումը։ Սպասվում է, որ դրան կմասնակցի ՌԴ ԱԳ նախարար Սերգեյ Լավրովը։