18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
ԱՄՆ-ն Թուրքիայից պահանջել է հրաժարվել Ադրբեջանին աջակցելուց որպես F-16-երի գործարքի մաս․ Օմեր Չելիք
Քաղաքականություն
28.11.2023 | 12:18
Թուրքիայի նախագահ Ռեջեփ Թայիփ Էրդողանի գլխավորած «Արդարություն ու զարգացում» կուսակցության մամուլի խոսնակ Օմեր Չելիքը մամուլի ասուլիսում հայտարարել է, թե Ղարաբաղի պատերազմի ժամանակ ԱՄՆ-ն Թուրքիայից պահանջել է դադարեցնել աջակցությունը Ադրբեջանին։
«Թուրքիան պետություն չէ, որը կարող է տրվել շանտաժի․ վերջին իրավիճակը F-16-երի ու F-35-երի հետ կապված։ Ադրբեջանը պայքար էր սկսել վերադարձնելու իր հողերը Ղարաբաղում։ Թուրքիան աջակցում էր այդ պայքարին, և նրանք ասում էին Թուրքիային՝ դադարեցնել աջակցությունը, որպես F-16 ու F-35 գնելու պայման։ Մենք դա չենք ընդունի»,-ասել է Չելիքը։
Ադրբեջանի և Հայաստանի միջև բանակցությունների վերաբերյալ հարցին ի պատասխան Չելիքը նշել է, որ ցանկանում են Ադրբեջանի և Հայաստանի միջև բանակցություններն ավարտվեն համաձայնագրով։
«Այստեղ հատուկ ներկայացուցիչներ կան։ Հատուկ ներկայացուցիչների միջոցով արդեն իսկ փորձ է արվում նպաստել այս գործընթացին։ Այսպիսով՝ Ադրբեջանի և Հայաստանի միջև խաղաղության համաձայնագրի ստորագրումը՝ սահմանների հստակեցումից մինչև այլ հարցեր, նշանակում է հետևհալ սկզբունքի ամրապնդում՝ եկեք միասին լուծենք այս տարածաշրջանի խնդիրները, այլ ոչ թե տարածաշրջանից դուրս խաղացողների ներգրավելով՝ նրանց, ովքեր ցանկանում են շահագործել, ինչ-որ նպատակներ են հետապնդում՝ իմպերիալիստական նպատակներ։ Սա նպաստում է տարածաշրջանային խաղաղությանը։ Այդ իսկ պատճառով մենք աջակցում ենք բանակցությունների դրական առաջընթացին»,-ասել է Էրդողանի կուսակցության խոսնակը։
