Քաղաքականություն
27.11.2023 | 20:29
ՆԱՏՕ-ի գլխավոր քարտուղար Յենս Ստոլտենբերգը կոչ է արել երկարաձգել Իսրայելի և ՀԱՄԱՍ-ի միջև ավարտին մոտեցող քառօրյա զինադադարը, որպեսզի հնարավոր լինի ազատ արձակել ավելի շատ պատանդների, գրում է VOA-ն։
Լրագրողների հետ զրույցում ՆԱՏՕ-ի ղեկավարը նաև ասել է, որ Իրանը «պետք է զսպի իր խամաճիկներին»։ ՀԱՄԱՍ-ը տարածաշրջանային դաշինքի մի մասն է, որի մեջ են մտնում Իրանը, Սիրիան և Լիբանանի շիաների «Հըզբոլլահ» խմբավորումը։ Բոլորն էլ, ընդհանուր առմամբ, դեմ են Մերձավոր Արևելքում ԱՄՆ-ի և Իսրայելի քաղաքականությանը:
Միևնույն ժամանակ, Կատարը, Եգիպտոսը, Միացյալ Նահանգները, Եվրամիությունը և Իսպանիան աշխատում են Գազայի հատվածում Իսրայելի և ՀԱՄԱՍ-ի միջև ժամանակավոր հրադադարը երկարաձգելու ուղղությամբ, հայտարարել է Պաղեստինի ինքնավարության արտաքին գործերի նախարար Ռիադ ալ-Մալիքին։
Կոչ անելով տևական զինադադարի՝ կանխելու ավելի շատ խաղաղ բնակչության շարքում զոհերը, ալ-Մալիքին ասել է, որ ներկայիս զինադադարը կարող է երկարաձգվել «մեկ, երկու, երեք օրով», սակայն հավելել է, որ ոչ ոք հստակ չգիտի, թե որքան ժամանակով:
Այսօր ավելի վաղ համաձայնեցված քառօրյա զինադադարի վերջին օրն էր:
