23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Հյուսիսային Կորեան զորք և սպառազինություն է տեղակայել Հարավային Կորեայի հետ սահմանի մոտ
Քաղաքականություն
27.11.2023 | 15:08
Հարավային և Հյուսիսային Կորեաների միջև ռազմական համաձայնագրի մասնակի կասեցումից հետո ԿԺԴՀ իշխանությունները զորքեր և ծանր սպառազինություն են տեղակայել երկու երկրների սահմանի մոտ գտնվող ապառազմականացված գոտում։ Այս մասին հայտնել է հարավկորեական Yonhap գործակալությունը՝ հղում անելով երկրի զինված ուժերին։
Ըստ ամենայնի, Փհենյանը փորձում է վերականգնել անվտանգության կետերը, որոնք ապամոնտաժվել էին 2018 թվականին միջկորեական ռազմական համաձայնագրի կնքումից հետո, նշել են Հարավային Կորեայի զինված ուժերի ներկայացուցիչները։
Նրանց տվյալներով՝ ծանր սպառազինությամբ զինված հյուսիսկորեացի զինվորները նոյեմբերի 24-ից մի քանի վայրերում վերականգնել են դիրքերը։ Հյուսիսային Կորեան ներկայում վերակառուցում է մի քանի պահակակետեր, սակայն սպասվում է, որ դրանք բոլորը կվերականգնվեն, լրագրողներին հայտնել է Հարավային Կորեայի բանակի բարձրաստիճան պաշտոնյան։
Սեուլը խոստացել է ուշադիր հետևել ԿԺԴՀ-ի գործողություններին՝ մոտալուտ սադրանքների նշաններ հայտնաբերելու համար։
Կորեայի Հանրապետության նախագահ Յուն Սեոկ Յոլը նույնպես նախազգուշացրել է, որ Սեուլը կվերահսկի սահմանի մոտ իրականացվող գործողությունները:
