Քաղաքականություն
24.11.2023 | 16:50
Հունգարիայի արտաքին գործերի և առևտրի նախարար Պետեր Սիյարտոն այցով Ադրբեջանի վերահսկողության տակ գտնվող Արցախի գրավյալ Ջրականում է։ Ադրբեջանական լրատվամիջոցների հաղորդմամբ՝ Սիյարտոն այնտեղ մասնակցելու է գյուղի հիմնարկեքի արարողության։
Միջոցառմանը ներկա են նաև Ադրբեջանի աշխատանքի և սոցիալական պաշտպանության նախարար Սահիլ Բաբաևը, Քաղաքաշինության և ճարտարապետության պետական կոմիտեի նախագահ Անար Գուլիևը, Ադրբեջանի նախագահ Իլհամ Ալիևի հատուկ ներկայացուցիչ Վահիդ Հաջիևը։
Նշվում է, որ գյուղի գլխավոր հատակագծի նախագիծը պատրաստվել է Ադրբեջանի քաղաքաշինության և ճարտարապետության պետական կոմիտեի պատվերով՝ հունգարական «KESZ» ընկերությունների խմբի և պետական գլխավոր նախագծային ինստիտուտի կողմից։
Հավելենք, որ հունգարական պատվիրակությունն Ադրբեջան է մեկնել վարչապետ Վիկտոր Օրբանի գլխավորությամբ՝ SPECA գագաթնաժողովին մասնակցելու համար։
Էմմա Չոբանյան
