07.10.2026 | 16:30
ԱԺ-Կառավարություն հարցուպատասխանը՝ ՈՒՂԻՂ
Իսրայելցի զինվորականները Գազայի բնակիչներին զգուշացնում են, որ պատերազմը դեռ ավարտված չէ
Քաղաքականություն
24.11.2023 | 13:00
Մինչ զինադադարի ուժի մեջ մտնելը՝ իսրայելցի զինվորականները սոցիալական ցանցերում տեսանյութ են հրապարակել, որում Գազայի հատվածի բնակիչներին զգուշացնում են, որ պատերազմը դեռ չի ավարտվել, գրում է BBC-ի ռուսական ծառայությունը։
«Մարդասիրական դադարը ժամանակավոր է։ Գազայի հատվածի հյուսիսային հատվածը վտանգավոր պատերազմական գոտի է, և դեպի հյուսիս տեղաշարժն արգելված է։ Ձեր անվտանգության համար դուք պետք է մնաք հարավում գտնվող հումանիտար գոտում»,- Գազայի բնակիչներին ուղղված արաբերեն ուղերձում ասել է Իսրայելի պաշտպանության բանակի խոսնակ Ավիչայ Ադրայը:
Հիշեցնենք, որ այսօր Գազայի հատվածում Իսրայելի և ՀԱՄԱՍ-ի միջև ռազմական գործողությունների քառօրյա դադարի մասին համաձայնությունն ուժի մեջ է մտել։ Օրվա ընթացքում ՀԱՄԱՍ-ի գրոհայինները պետք է ազատ արձակեն իսրայելցի առաջին պատանդներին՝ տեղական ժամանակով 16:00-ին։
Համաձայնագրի շրջանակում, որում առանցքային միջնորդ են հանդես եկել Կատարի իշխանությունները, ինչպես նաև Եգիպտոսն ու ԱՄՆ-ը, ՀԱՄԱՍ-ի զինյալներն այսօր կազատեն 13 իսրայելցի պատանդի։ Ընդհանուր առմամբ, նախատեսվում է առնվազն 50 հոգու ազատ արձակում։
Իսրայելի բանտերից էլ կազատվեն 39 պաղեստինցի բանտարկյալներ՝ կանայք և անչափահասներ։ Գազայի հատվածի՝ Եգիպտոսի հետ սահմանին գտնվող «Ռաֆահ» անցակետով ամեն օր նախատեսվում է ուղարկել 130 հազար լիտր դիզվառելիք և 200 բեռնատար մարդասիրական օգնություն։
