23.07.2026 | 23:28
Կապանը` ԱՊՀ 2026 թվականի երիտասարդական մայրաքաղաք
ԵՄ-ն կարող է Մոլդովային և Վրաստանին ընդունել առանց չվերահսկվող տարածքների
Քաղաքականություն
24.11.2023 | 13:24
Եվրամիությունը կարող է դիտարկել Մոլդովային և Վրաստանին մասնակի իր կազմ ընդունելու հնարավորությունը՝ առանց Մերձդնեստրի, Աբխազիայի և Հարավային Օսիայի տարածքների, որոնք չեն վերահսկվում Քիշնևի և Թբիլիսիի կողմից։ Այս մասին հայտարարել է Եվրամիության արտաքին քաղաքականության ծառայության պաշտոնական ներկայացուցիչ Փիթեր Ստանոն։
«Վրաստանի և Մոլդովայի եվրոպական ապագան չի կարող հակամարտությունների պատանդ լինել: Դա հաստատվել է ԵՄ-ում ամենաբարձր մակարդակով»,- «Իզվեստիա»-ին ասել է Ստանոն:
Նա ընդգծել է, որ Եվրամիությունն աջակցում է այդ երկրների տարածքային ամբողջականությանը և ինքնիշխանությանը։
Նոյեմբերի 8-ին Եվրահանձնաժողովն առաջարկել է Մոլդովայի և Ուկրաինայի համար բանակցություններ սկսել ԵՄ-ին անդամակցելու շուրջ։ Առաջարկվում է, որ Վրաստանին տրվի Եվրամիությանն անդամակցելու թեկնածուի կարգավիճակ։ Այնուհետև Մոլդովայի նախագահ Մայա Սանդուն ասել է, որ ԵՄ-ին երկրի անդամակցության «վատագույն սցենարը» կլինի մասնակի ինտեգրումը։
Վրաստանն ու Մոլդովան ԵՄ-ին անդամակցելու հայտ են ներկայացրել 2022 թվականի մարտին, իսկ Ուկրաինան՝ 2022-ի փետրվարին։
