Հայաստանի դեսպանն իր հավատարմագրերն է հանձնել Բանգլադեշի նախագահին

Բանգլադեշում ՀՀ դեսպան Արմեն Մարտիրոսյանը հուլիսի 6-ին իր հավատարմագրերը հանձնեց Բանգլադեշի նախագահ Մոհամմադ Աբդուլ Համիդին։ Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:

Արարողությանը հաջորդած առանձնազրույցի ընթացքում Բանգլեդեշի նախագահը նշեց, որ թեև այս տարի լրանում է Հայաստանի և Բանգլադեշի միջև դիվանագիտական հարաբերությունների հաստատման 25-ամյակը, սակայն երկու ժողովուրդների պատմական առնչություններն ունեն ավելի քան չորս հարյուր տարվա պատմություն։

Նախագահ Աբդուլ Համիդն ընդգծեց հայերի ունեցած առանձնահատուկ մշակութային ավանդը Բենգալում՝ բերելով մի քանի ուշագրավ պատմական փաստ։ Նախագահը մասնավորապես նշեց, որ Բենգալի առաջին դպորցը, որը որպես կրթօջախ գործում է մինչ օրս, հիմնել են հայերը, Դաքքայում գործում է հայկական եկեղեցի (Սուրբ Հարություն հայ առաքելական եկեղեցին՝ հիմնված 1781 թվականին), քաղաքի կենտրոնական մասում են գտնվում «Հայկական թաղամասը» (Armeniatola) և «Հայկական փողոցը», իսկ տարածքը, որում այժմ գտնվում է նախագահական նստավայրը, մոտ երկու դար առաջ պատկանել է Մանուկ անունով հայ վաճառականի։

Շնորհակալություն հայտնելով ցուցաբերված բարձր ընդունելության և բարեմաղթանքների համար՝ դեսպան Արմեն Մարտիրոսյանը նշեց, որ երկու ժողովուրդների միջև ձևավորված պատմական կապերը թույլ են տալիս նոր լիցք հաղորդել երկկողմ հարաբերությունների հետագա առաջխաղացմանը։

Նախագահ Մոհամմադ Աբդուլ Համիդը դեսպան Արմեն Մարտիրոսյանին խնդրեց իր ջերմ ողջույնները և բարեմաղթանքները փոխանցել Նախագահ Սերժ Սարգսյանին։