23.02.2026 | 11:44
Ամսական 42 միլիոն դրամ է մտնում Երևանի բյուջե՝ ավտոմատ ինքնասպասարկող սարքերից․ քաղաքապետ․ ՏԵՍԱՆՅՈՒԹ
Մեծ Բրիտանիայի պետնախարարը Բաքվում մարդու իրավունքների և քաղբանտարկյալների իրավիճակի հետ կապված հարցեր է քննարկել
Քաղաքականություն
23.11.2023 | 17:25
Մեծ Բրիտանիայի Եվրոպայի հարցերով պետնախարար Լեո Դոքերթին Ադրբեջան կատարած այցի շրջանակում հանդիպել է տեղի մի խումբ իրավապաշտպանների և իրավաբանների հետ։ Այս մասին X-ում գրառմամբ հայտնել է Բաքվում Մեծ Բրիտանիայի դեսպան Ֆերգյուս Օլդը։
Նա նշել է, որ քննարկվել է Ադրբեջանում մարդու իրավունքների վիճակը, Գուբադ Իբադօղլուի և Abzas Media-ի ղեկավարների ձերբակալությունը, ինչպես նաև Ադրբեջանում 4-րդ Համընդհանուր պարբերական վերանայման (Մարդու իրավունքների խորհրդի) գործընթացը։ Հանդիպմանը մասնակցել են իրավապաշտպաններ Ռասուլ Ջաֆարովը, Զոհրաբ Իսմայիլը, փաստաբաններ Բահրուզ Բայրամովը, Զիբեյդա Սադիգովան և Գալիբ Բայրամովը (Գուբադ Իբադօղլուի եղբայրը)։
Իրավապաշտպան Ռասուլ Ջաֆարովը Թուրան գործակալությանը հայտնել է, որ հանդիպման ընթացքում քննարկվել է մարդու իրավունքների հետ կապված իրավիճակը։ Խոսվել է քաղաքացիական հասարակության գործունեության գործնական և օրենսդրական սահմանափակումների, «Տերտերի գործով» դեռևս անազատության մեջ գտնվող անձանց վերականգնմանն ուղղված քայլերի և Հայաստանի հետ խաղաղության պայմանագրի ստորագրման կարևորության մասին, որը ապագայում կարող է դրական ազդեցություն ունենալ տարածաշրջանում ժողովրդավարական գործընթացների վրա։
«Պետնախարարին տեղեկացվել է մարդու իրավունքների վիճակի մասին։ Հույս ենք հայտնել, որ խնդիրները կլուծվեն»,- ասել է Ջաֆարովը։
Փաստաբան Բահրուզ Բայրամովի խոսքով էլ՝ քննարկվել են նաև օրենքի գերակայության ապահովման հետ կապված խնդիրներ։
«Պետնախարարը հատուկ ուշադրություն է դարձրել Գուբադ Իբադօղլուի գործին՝ դա բացատրելով այն հանգամանքով, որ Իբադօղլուն դասավանդել է բրիտանական համալսարանում»,- ասել է Բայրամովը։
Էմմա Չոբանյան
