07.10.2026 | 13:05
Կառուցապատողներին հիշեցրել են՝ գնման իրավունքի պայմանագրերում սպառողների իրավունքները խախտող պայմաններ չեն կարող լինել
Ցուցադրվել է «Բացակա պատկեր» ֆիլմը՝ նվիրված Արտավազդ Փելեշյանին
Մշակույթ
23.11.2023 | 15:23
«Մոսկվա» կինոթատրոնում կայացել է ռեժիսոր Հրանտ Վարդանյանի «Բացակա պատկեր» ֆիլմի առաջին ցուցադրությունը՝ նվիրված ռեժիսոր, սցենարիստ, դերասան, համաշխարհային կինեմատոգրաֆիայի դասական Արտավազդ Փելեշյանին․ տեղեկացնում են ՀՀ ԿԳՄՍՆ-ից։
Միջոցառմանը ներկա են եղել ԿԳՄՍ նախարարի տեղակալ Դանիել Դանիելյանը, Արտավազդ Փելեշյանի կինը՝ Աիդա Սարգսյանը, կինոաշխարհի ներկայացուցիչներ և կինոսերներ:
Ֆիլմը ստեղծվել է ՀՀ կրթության, գիտության, մշակույթի և սպորտի նախարարության աջակցությամբ, փաստավավերագրական ֆիլմերի «Հայկ» կինոստուդիայի և «Արև» ֆիլմ-ստուդիայի համատեղ արտադրությամբ: Ֆիլմի շնորհանդեսը կայացել է Հայ կինոյի 100-ամյա հոբելյանական միջոցառումների շրջանակում՝ Արտավազդ Փելեշյանին նվիրված հոբելյանական ցուցադրությամբ, որը կազմակերպել էր Հայաստանի ազգային կինոկենտրոնը:
«Այս ֆիլմը փորձ էր՝ խոսելու Փելեշյանի հետ իր լեզվով: Կինոյի նյարդը զգացող այս հսկան համաշխարհային կինոպատմության մեջ իր ուրույն ձեռագիրն ունի: Նա իր փոքր պատուհանը բացեց կինոաշխարհում՝ իր արվեստով շատ կարծրատիպեր կոտրելով: Ես հասկացա, որ կինոն կարող է լինել առանց խոսքի, և միևնույնն է՝ դու հասկանաս, թե ինչ է այն ուզում ասել»,- ասել է «Բացակա պատկերը» ֆիլմի ռեժիսոր Հրանտ Վարդանյանը:
«Բացակա պատկեր» ֆիլմը սև-սպիտակ է։ Ֆիլմը նկարելիս ռեժիսորն օգտագործել է նաև հատվածներ՝ Արտավազդ Փելեշյանի տարբեր ֆիլմերից։ Դրանք հիմնականում կինոէկրանին են ու տարբեր առիթներով ցուցադրվում են տարբեր քաղաքների կինոդահլիճներում։
«Բացակա պատկեր» ֆիլմի կադրերում Արտավազդ Փելեշյանը տիկնոջ հետ շրջում է այն վայրերով և քաղաքներով՝ Լիսաբոն, Փարիզ, Լիոն, Երևան, որտեղ Վարպետի հետ հանդիպումներ են կազմակերպվել։ Նրա վարպետության դասերը, խոսքը, կինոցուցադրությունները նկարահանվել են՝ որպես փաստագրական նյութ։
