07.10.2026 | 13:05
Կառուցապատողներին հիշեցրել են՝ գնման իրավունքի պայմանագրերում սպառողների իրավունքները խախտող պայմաններ չեն կարող լինել
Թուրքիան ՆԱՏՕ-ին հայտնել է, որ Շվեդիայի հայտը չի վավերացնի մինչև դաշինքի հաջորդ շաբաթվա հանդիպումը․ Reuters
Քաղաքականություն
23.11.2023 | 13:59
Թուրքիան ՆԱՏՕ-ին տեղեկացրել է, որ Շվեդիայի անդամակցության հայտի վավերացումը ժամանակին չի ավարտվի, որը թույլ կտար կազմակերպել երկրի անդամակցության արարողությունը հաջորդ շաբաթ նախանշված դաշինքի արտգործնախարարների հանդիպմանը: Այս մասին Reuters-ին հայտնել են խնդրին ծանոթ երկու աղբյուրներ:
Անցյալ շաբաթ Թուրքիայի խորհրդարանի արտաքին հարաբերությունների հանձնաժողովը հետաձգել էր ՆԱՏՕ-ին Շվեդիայի անդամակցության հայտի վերաբերյալ քվեարկությունը։
Աղբյուրներից մեկն ասել է, որ հանձնաժողովը, ամենայն հավանականությամբ, այդ հարցի շուրջ քննարկումները կվերսկսի հաջորդ երեքշաբթի կամ չորեքշաբթի։ ՆԱՏՕ-ի արտաքին գործերի նախարարները կհանդիպեն Բրյուսելում այդ օրերին՝ նոյեմբերի 28-29-ը, և արևմտյան պաշտպանական բլոկի որոշ անդամներ հույս ունեին, որ այս հավաքը կնշանավորի Շվեդիայի անդամակցությունը:
Թուրքիայի ԱԳՆ-ից մեկնաբանություն ստանալ լրատվամիջոցը չի կարողացել։
Նշենք, որ և՛ Շվեդիան, և՛ Ֆինլանդիան ՆԱՏՕ-ին անդամակցելու խնդրանքով դիմել էին անցյալ տարվա մայիսին՝ Ուկրաինա Ռուսաստանի ներխուժումից հետո:
Թուրքիայի նախագահ Ռեջեփ Թայիփ Էրդողանն այն ժամանակ առարկություններ ուներ երկու դիմումների մասով էլ, սակայն ապրիլին հավանություն տվեց Ֆինլանդիայի հայտին, իսկ Շվեդիայի հայտը մինչ օրս չի վավերացվել։
Էմմա Չոբանյան
