Քաղաքականություն
22.11.2023 | 17:01
Մեծ Բրիտանիայի և Հյուսիսային Իռլանդիայի Միացյալ Թագավորության Եվրոպայի հարցերով նախարար Լեո Դոքերթին Բաքվում հանդիպել է Ադրբեջանի ԱԳ նախարար Ջեյհուն Բայրամովին։ Ըստ Ադրբեջանի ԱԳՆ-ի՝ հանդիպման ընթացքում կողմերը մտքեր են փոխանակել երկկողմ և տարածաշրջանային համագործակցության, ինչպես նաև միջազգային անվտանգության հարցերի շուրջ։
Բայրամովն ասել է, որ Ադրբեջանը կարևորում է Մեծ Բրիտանիայի հետ բազմակողմ հարաբերությունները, անդրադարձել է քաղաքական, տնտեսական, էներգետիկ, անվտանգության և հումանիտար ոլորտներում երկու երկրների միջև առկա գործընկերության հետագա ամրապնդման հնարավորություններին և ասել, որ քաղաքական երկխոսության ակտիվացումը կարևոր է համագործակցության նոր ոլորտների մշակման առումով։
Նա նաև բրիտանացի նախարարին պատմել է տարածաշրջանում տիրող իրավիճակի ու իրողությունների մասին, խոսել Հարավային Կովկասի տարածաշրջանում «կայուն խաղաղություն հաստատելու ծրագրերից և այդ ուղղությամբ ձեռնարկվող գործնական քայլերից, ինչպես նաև Հայաստանի հետ հարաբերությունների կարգավորման օրակարգից»։
Հավելենք, որ այսօր ավելի վաղ Դոքերթին հանդիպել էր Ադրբեջանի նախագահ Իլհամ Ալիևին։
Օրերս բրիտանացի պաշտոնյան այցով նաև Հայաստանում էր։
Էմմա Չոբանյան
