«Վագները» ցանկանում է ՀՕՊ համակարգեր փոխանցել «Հըզբոլլահ»-ին կամ Իրանին․ Քիրբի

Ռուսաստանի կառավարությունը, ըստ ԱՄՆ հետախուզության, «Վագներ» մասնավոր ռազմական ընկերությանը հանձնարարել է ՀՕՊ համակարգեր փոխանցել կա՛մ լիբանանյան «Հըզբոլլահ» շարժմանը, կա՛մ Իրանին, գրում է DW-ի ռուսական ծառայությունը:

«Մեր ստացած տեղեկատվությունը ցույց է տալիս, որ վագներականները, Ռուսաստանի կառավարության ցուցումով, պատրաստվում էին հակաօդային պաշտպանության միջոցներ տրամադրել կա՛մ «Հըզբոլլահ»-ին, կա՛մ Իրանին»,- լրագրողներին ասել է Սպիտակ տան Ազգային անվտանգության խորհրդի ռազմավարական հաղորդակցության համակարգող Ջոն Քիրբին։

Նրա խոսքով՝ դա տեղի է ունեցել ռազմական ոլորտում ռուս-իրանական «աննախադեպ» համագործակցության շրջանակում։

«Ահաբեկչությանը հակազդելու համար մենք պատրաստ ենք օգտագործել մեր պատժամիջոցների գործիքները ռուս ֆիզիկական և իրավաբանական անձանց դեմ, որոնք ներգրավված են մատակարարումների ապակայունացման մեջ»,- ասել է Քիրբին՝ հավելելով, որ ԱՄՆ-ն ուշադիր հետևելու է՝ արդյո՞ք «Վագները» զինտեխնիկա է մատակարարում «Հըզբոլլահ»-ին կամ Իրանին:

Ըստ նրա՝ Թեհրանն «այդ աջակցության դիմաց դիտարկում է Ռուսաստանին բալիստիկ հրթիռներ տրամադրելու հնարավորությունը՝ Ուկրաինայում օգտագործելու համար»։

Մոսկվան չի մեկնաբանել այս հայտարարությունները։

Նոյեմբերի սկզբին The Wall Street Journal-ը, հղում անելով նաև ԱՄՆ հետախուզությանը, հայտնել էր, որ «Վագները» ծրագրում է «Հըզբոլլահ» շարժմանը փոխանցել «Պանցիր C-1» զենիթահրթիռային համակարգ։ Մեկնաբանելով այս հաղորդագրությունը՝ ՌԴ նախագահի մամուլի քարտուղար Դմիտրի Պեսկովն ասել էր, որ «Վագներ»-ը «դե ֆակտո» գոյություն չունի, ուստի նման դատողությունները «ոչ մի բանի վրա չեն հիմնված»։