Ուկրաինան վերսկսում է ԱԹՍ-ներով հարձակումները Մոսկվայի վրա

Մոսկվայի մարզի Էլեկտրոստալ քաղաքում նոյեմբերի 20-ի գիշերն անօդաչու թռչող սարքի հարձակում է կանխվել։ Մոսկվայի քաղաքապետ Սերգեյ Սոբյանինի խոսքով՝ դրոնը շարժվում էր դեպի Մոսկվա։ Նա պարզաբանել է, որ միջադեպը հնարավոր է եղել հաղթահարել առանց ավերածությունների և տուժածների, գրում է The Moscow Times-ը։

ՌԴ Պաշտպանության նախարարությունն իր հերթին հայտնել է, որ միջադեպը տեղի է ունեցել նոյեմբերի 19-ին, Մոսկվայի ժամանակով 23:20-ին։

Նոյեմբերի լույս 19-ի գիշերը Մոսկվայի մարզի Բոգորոդսկի քաղաքային թաղամասում էլ հերթական անօդաչու թռչող սարքն է խոցվել, հայտնում են Մոսկվայի քաղաքապետն ու Պաշտպանության նախարարությունը։ Shot տելեգրամյան ալիքի հաղորդմամբ՝ անօդաչու թռչող սարքի բեկորներն ընկել են Մոսկվայի մարզի Գորկովսկոյե մայրուղու տարածքում։ Այս հատվածի երթևեկությունը որոշ ժամանակով ստիպված են եղել փակել։

Անօդաչու թռչող սարքի միջոցով ՌԴ մայրաքաղաքի վրա գրոհելու նախորդ փորձը գրանցվել էր հոկտեմբերի 7-ի գիշերը։ Այնուհետև հակաօդային պաշտպանության ուժերը ԱԹՍ էին խոցել Իստրայում։

Մայիսի սկզբից Մոսկվան և մերձմոսկովյան շրջանը անօդաչու թռչող սարքերի հարձակման են ենթարկվել ավելի քան երկու տասնյակ անգամ։ Մեկնաբանելով մայիսի 30-ի հարձակումը՝ նախագահ Վլադիմիր Պուտինը պահանջել է «խտացնել» հակաօդային պաշտպանության համակարգը։ Դրանից հետո անօդաչու թռչող սարքերը վնասել էին երեք բնակելի շենք և գրեթե գրոհել էլիտար բնակավայրերը Ռուբլևո-Ուսպենսկոյե մայրուղու մոտ:

«Կիևի ռեժիմն ընտրել է Ռուսաստանին վախեցնելու, Ռուսաստանի քաղաքացիներին վախեցնելու և բնակելի շենքերի վրա հարձակում գործելու ուղին։ Սա, իհարկե, ահաբեկչական գործունեության ակնհայտ նշան է»,- ասել է Պուտինը՝ խոստովանելով, որ Ռուսաստանը ևս հարվածներ է հասցնում Ուկրաինայի տարածքին։

Նոյեմբերին Ուկրաինայի Զինված ուժերի գլխավոր շտաբի մարտական հարվածային համակարգերի գլխավոր տնօրինության ղեկավար Սերգեյ Բարանովը The Independent-ին տված հարցազրույցում խոսել է ձմռանը անօդաչու թռչող սարքերի խոշոր հարձակման՝ Կիևի պլանների մասին, քանի որ խիստ եղանակային պայմանները կխոչընդոտեն ցամաքային գործողություններին։ Հարվածների թիրախը, նրա խոսքով, պետք է լինեն Ղրիմի և Ռուսաստանի սահմանամերձ շրջանների ռազմակայաններն ու ենթակառուցվածքները։