Արգենտինան նոր նախագահ ունի․ նա ցանկանում է խզել հարաբերությունները ՌԴ-ի, Չինաստանի և Բրազիլիայի հետ

Արգենտինայում նախագահական ընտրություններում հաղթել է Խավիեր Միլեյը, որը գլխավորում է «Ազատությունը գալիս է» դաշինքի մաս կազմող Ազատական ​​կուսակցությունը, գրում է DW-ի ռուսական ծառայությունը։

Նախնական տվյալներով՝ նա հավաքել է ձայների մոտ 56 տոկոսը։ Նոյեմբերի 19-ի լույս 20-ի գիշերը նրան ընտրություններում հաղթանակի առթիվ շնորհավորել են գլխավոր  մրցակից, Արգենտինայի էկոնոմիկայի նախարար Սերխիո Մասսան, որը իշխող «Միություն հանուն հայրենիքի» կոալիցիայի թեկնածուն էր, ինչպես նաև լատինաամերիկյան մի շարք երկրների ղեկավարներ։

«Ես կապ հաստատեցի Խավիեր Միլեյի հետ՝ նրան շնորհավորելու և հաջողություն մաղթելու համար, քանի որ նա այն նախագահն է, ում արգենտինացիների մեծամասնությունն ընտրել է առաջիկա չորս տարիների համար»,- ասել է Սերխիո Մասսան նախքան քվեարկության պաշտոնական արդյունքների հրապարակումը։

Միլեյին շնորհավորել են նաև Բրազիլիայի և Չիլիի նախագահները, իսկ ահա Կոլումբիայի նախագահ Գուստավո Պետրոն հիասթափություն է հայտնել Արգենտինայի նախագահական ընտրություններում աջակողմյան թեկնածուի հաղթանակի կապակցությամբ՝ այն անվանելով «տխուր իրադարձություն Լատինական Ամերիկայի համար»։

Արգենտինայի նոր նախագահը չի սատարում ԲՐԻԿՍ-ին միանալու գաղափարը, հանդես է գալիս քաղաքացիների կյանքին կառավարության նվազագույն միջամտության օգտին, ցանկանում է վերացնել Կենտրոնական բանկն ու առաջարկում է ազգային արժույթը փոխարինել ԱՄՆ դոլարով։

Նախընտրական քարոզարշավի ընթացքում Միլեյը նաև հայտարարել էր Ռուսաստանի, Չինաստանի և Բրազիլիայի «կոմունիստական» կառավարությունների հետ հարաբերությունները խզելու պլանների մասին։ Իսկ ահա տնտեսական խնդիրները լուծելու համար Արգենտինայի նոր նախագահը մտադիր է լրջորեն կրճատել բյուջեի ծախսերը։

Էմմա Չոբանյան