Պեսկովը խնդիրներ է խոստանում ՌԴ-ից հեռանալուց հետո երկիրը քննադատողներին

Ռուսաստանցիների համար, որոնք լքել են իրենց հայրենիքը Ուկրաինայում պատերազմի սկսվելուց հետո և իրենց թույլ են տվել քննադատել ՌԴ իշխանությունների գործողությունները դրսից, «շատ դժվար կլինի վերադառնալ»։ Այս մասին հայտարարել է Կրեմլի խոսնակ Դմիտրի Պեսկովը, գրում է DW-ի ռուսական ծառայությունը։

«Հայրենիքը բոլորի համար մեկն է և այն միշտ բաց է բոլորի համար՝ բացի թշնամիներից»,- հայտարարել է Պեսկովը։

Նա նշել է, որ պատերազմի մեկնարկից հետո Ռուսաստանից հեռացած, Ուկրաինայի զինված ուժերի համար գումար հավաքած, տարբեր հասարակական-քաղաքական իրադարձությունների ժամանակ ելույթ ունեցող և Ռուսաստանին հանդիմանողների համար անհնար կլինի վերադառնալ հայրենիք։

«Ես դեռ չեմ խոսում օրենքների մասին, որոնք գործելու են նրանց նկատմամբ։ Մարդիկ նրանց չեն ընդունի»,- ասել է Կրեմլի խոսնակը։

Նա հավելել է, որ հայրենիքում մնացած ռուսաստանցիները «միշտ կընդունեն ռելոկանտներին», որոնք «շփոթվել» են և ցանկանում են վերադառնալ։

«Բայց նրանց համար, ովքեր, կոպիտ ասած, բերանները բացել են իրենց երկրի դեմ, նրանց համար շատ դժվար կլինի բացատրել մեր մեջ ապրող մարդկանց։ Դա նրանց համար մեծ խնդիր կլինի»,- նշել է Պեսկովը։

Կրեմի խոսնակը համաձայն չէ տեսակետների հետ, որ պատերազմի մեկնարկից հետո երիտասարդների զգալի մասը հեռացել է Ռուսաստանից։

«Քանի՞ տղա է գնացել ռազմաճակատ՝ որպես կամավոր: Քանի՞ տղա գնաց ռազմաճակատ տարբեր ստորաբաժանումներում: Քանի՞սն են մոբիլիզացվել և այժմ կռվում են: Ի վերջո, նրանք բոլորը մնացին այստեղ»,- հայտարարել է Պեսկովը:

Էմմա Չոբանյան