26.04.2026 | 12:24
Ուրախ եմ լսել, որ նախագահ Դոնալդ Թրամփը և մյուս ներկաները ապահով են ու լավ վիճակում․ Նիկոլ Փաշինյան
«Եթե «Մարտի 1»-ի բացահայտումը երկրի զարգացման գործոն լիներ, բացահայտված կլիներ»․ Միքայել Մելքումյան. ՏԵՍԱՆՅՈՒԹ
Քաղաքականություն
27.07.2018 | 20:31
Ռոբերտ Քոչարյանին ուղղված քննչական ծառայության մեղադրանքներում Հանրապետական Դավիթ Հարությունյանն իրավական ձևակերպումներ չի տեսնում և չի կարող իրավական ձևակերպումներով պատասխանել նրան առաջադրված մեղադրանքին։
«-Ես ծայրաստիճան մտահոգիչ եմ համարում դա։
-Ինչու՞։
-Բազմաթիվ պատճառներ կան։ Նախ, եթե իրավական լուրջ փաստարկներ լինեին, էդ փաստարկները պետք է ներկայացված լինեին մամլո հաղորդագրության մեջ, որը ինչպես ես նշել էի, չէին պարունակում իրավական տարրեր, ավելին ես այնտեղ տեսնում եմ սխալ տարրեր և օրենքի և մեկնաբանության»։
Պարոն Հարությունյանի կարծիքով՝ 2008-ի մարտի 1-ին Ռոբերտ Քոչարյանը բոլոր հիմքերն ուներ, որպեսզի բանակը բերեր մայրաքաղաք։ 2005-ի Սահմանադրությունը, ըստ նախկին պատգամավորի, տալիս էր նրան այդ հնարավորությունը: «Այն իրավիճակը, որ ստեղծվել էր 2008-ի մարտի 1-ին, իսկապես շատ ծանր իրավիճակ էր, և ես չեմ կարող մեղադրել որևէ մեկին, եթե կոնկրետ սպանությունները չեն բացահայտվել։ Ինչ վերաբերվում է արտակարգ դրություն հայտարարելուն, իմ գնահատականն է, որ իրավիճակը Հայաստանի Հանրապետությունում այդ օրերին, Երևանի կենտրոնում, այնպիսին էր, որ արտակարգ դրություն չհայտարարելը կարող էր բերել լրացուցիչ զոհերի»,- ասում է ՀՀԿ գործադիր մարմնի անդամ Դավիթ Հարությունյանը։
Նա այսօր էլ վստահ է, որ երկրորդ նախագահն իր լիազորություններից դուրս չի եկել, և ըստ նրա, հենց Սահմանադրությունն էլ թույլ չի տալիս, որ նախագահի արարքների համար նրան պատասխանատվության ենթարկեն։ Այսօր Հանրապետական գործիչը միտում է տեսնում նոր իշխանությունների գործելակերպում՝ հետապնդվում են մարդիկ, որոնք Ադրբեջանի հետ հարաբերություններում ունեին բոլորովին այլ դիրքորոշում: «Ինչ-որ մի տենդենց ես տեսնում եմ, որ կարծես թե, հենց այդ մարդկանց են առաջին հերթին մեղադրանք առաջադրում»,- կասկածում է արդարադատության նախկին նախարարը։
Ծառուկյանական պատգամավոր Միքայել Մելքումյանը չի քաղաքականացնի Ռոբերտ Քոչարյանի հանդեպ քրեական հետապնդումը: «Մեկ բան կարող եմ ասել՝ որ մեր հանրապետությունում բոլորը օրենքի առաջ հավասար պետք է լինեն, արտոնություններ չպետք է լինեն»,- չի կասկածում Միքայել Մելքումյանը։
Այնուամենայնիվ, նա նույնպես մտահոգված է Քոչարյանին սպառնացող կալանավորումով։ Պատգամավորը կմտահոգվեր նույնիսկ այն դեպքում, եթե մյուս երկու նախագահներին էլ ինչ-որ բան սպառնար: «Որևէ մեկը չի կարող հաճույք զգալ դրանից, որ ինչ-որ բաներ են կատարվում, որովհետև չէ՞ որ 10 տարի յուրաքանչյուր նախագահի դեպքում երկիրը կառավարվել է և էդ կառավարման բովանդակությունը, ոճը հետևանք է ունեցել յուրաքանչյուր ընտանիքի համար»,- վերլուծում է ԱԺ ծառուկյանական փոխնախագահը։
Այսօր պատգամավորը հակված է վստահել դատարաններին, այդ վստահությունը պետք է Հայաստանին, զարգանալու ուրիշ ճանապարհ չկա։ Սակայն հայտնի է, որ պարոն Մելքումյանի կուսակցությունը Հայաստանի համար այդ ծանր օրերին կոալիցիայի մեջ էր Հանրապետականի հետ՝ ինչու՞ այն ժամանակ չբացահայտվեց «Մարտի 1»-ը։ Նա համոզված է, որ իշխանությունը չբացահայտելու պատճառներ ուներ․ «Եթե«Մարտի 1»-ի բացահայտումը երկրի զարգացման կարևորագույն գործոնը լիներ, անպայման բացահայտված կլիներ»։
Ի դեպ, պատգամավորը համոզված է, որ Ռոբերտ Քոչարյանի գործի նախաքննությունը երկար չի տևի, այն շատ արագ կմտնի դատարան։
Մհեր Արշակյան
