07.10.2026 | 15:00
Հայտարարվել են քիմիայի ոլորտում Նոբելյան մրցանակի դափնեկիրները
Թուրքիայի ՊՆ ղեկավարը խոսել է ռուսական C-400-ների կիրառման հնարավորության մասին
Քաղաքականություն
17.11.2023 | 19:53
Թուրքիան պատրաստ է անհրաժեշտության դեպքում օգտագործել Ռուսաստանից գնված հակաօդային պաշտպանության С-400 համակարգերը։ Այս մասին հայտարարել է Թուրքիայի պաշտպանության նախարար Յաշար Գյուլերը խորհրդարանում ունեցած ելույթում, գրում է Անադոլու գործակալությունը։
«Մենք աշխատում ենք շուրջօրյա՝ մեր երկիրն անվտանգ պահելու համար: Մենք չենք կարող գնել С-400-ներ և դրանք մի անկյունում պահել։ Երբ դա մեզ անհրաժեշտ լինի, մենք կսեղմենք կոճակը, և բոլոր հետաքրքրվողները կտեսնեն, թե ինչ տեղի կունենա»,- ասել է նախարարը։
Նա հայտնել է, որ Թուրքիան նախատեսում է նաև գնել ընդհանուր առմամբ 40 Eurofighter Typhoon կործանիչ։
«Մենք ցանկանում ենք գնել Eurofighter Typhoon-ներ։ Այն շատ արդյունավետ ինքնաթիռ է։ Այս ինքնաթիռները կապված են Մեծ Բրիտանիայի, Գերմանիայի և Իսպանիայի հետ»,- ասել է Գյուլերը։
Թուրք պաշտոնյայի խոսքով՝ Լոնդոնն ու Մադրիդը դրական են արձագանքել Անկարայի մտադրությանը, և այժմ աշխատանքներ են տարվում՝ «Գերմանիային համոզելու համար»։
Ի դեպ, այս հարցը լինելու է Թուրքիայի նախագահ Ռեջեփ Թայիփ Էրդողանի՝ Բեռլինի այցի հիմնական թեմաներից։
Գյուլերը նաև ասել է, թե Թուրքիայի ռազմաօդային ուժերի F-16 և F-4 ինքնաթիռները բավարար են անհրաժեշտ առաջադրանքները կատարելու համար։
«Բայց մենք, իհարկե, ավելի հեռուն ենք նայում: Դրա համար մենք դիմել են F-35-ի համար, սակայն F-35-ի հետ կապված որոշ խնդիրներ են առաջացել: Մենք նաև այլընտրանքների վրա ենք աշխատում»,- հայտարարել է Թուրքիայի ՊՆ ղեկավարը։
Էմմա Չոբանյան
