26.06.2026 | 16:09
Ինչ-որ մեկը գնահատե՞լ է՝ ինչ ազդեցություն է ունեցել Թրամփի կամ Մակրոնի աջակցությունը․ Վարդևանյան. ՏԵՍԱՆՅՈՒԹ
Իսրայելական զինվորականները հայտնել են Գազայում ՀԱՄԱՍ-ի ծովային նավահանգստի գրավման մասին
Քաղաքականություն
16.11.2023 | 19:23
188-րդ բրիգադի և Իսրայելի պաշտպանության բանակի Շայեթ 13 ստորաբաժանման զինծառայողները վերահսկողության տակ են վերցրել ՀԱՄԱՍ-ի կողմից վերահսկվող Գազայի նավահանգիստը։ Այս մասին հայտնել է Իսրայելի պաշտպանության բանակի մամուլի ծառայությունը, գրում է BBC-ի ռուսական ծառայությունը։
Խումբը նավահանգիստն օգտագործում էր որպես ուսումնական բազա իր գրոհային ուժերի և Իսրայելի տարածք ներթափանցելու համար:
Հաղորդագրության համաձայն՝ գործողության ընթացքում, որին մասնակցել են նաև ինժեներական կորպուսի և օդուժի զինվորականներ, ոչնչացվել է մոտ 10 թունելային ական, ՀԱՄԱՍ-ի այլ ենթակառուցվածքային օբյեկտներ, սպանվել է 10 զինյալ։ Տարածքում օգտագործվող թունելները բացվել են անմիջապես դեպի ծով՝ նպաստելով գրոհայինների չբացահայտված ներթափանցմանը:
Իսրայելի պաշտպանության բանակի տվյալներով՝ քաղաքացիական նավահանգստի քողի տակ ՀԱՄԱՍ-ն օգտագործել է տարածքն ահաբեկչական հարձակումներ նախապատրաստելու և իրականացնելու համար՝ օգտագործելով քաղաքացիական և Գազայի նավահանգստային ոստիկանության նավերը:
Հոկտեմբերի 7-ին Իսրայելի վրա արյունալի հարձակման ժամանակ որոշ զինյալներ ծովով ներխուժել են Իսրայել, իսկ հաջորդ շաբաթների ընթացքում պարբերաբար փորձեր էին արվում նույն կերպ ներխուժել Իսրայել։
Մասնավորապես, հոկտեմբերի 24-ին ՀԱՄԱՍ-ի առնվազն տասը գրոհային է սպանվել Գազայի հարավում գտնվող սահմանամերձ Զիկիմ քաղաքի ափերի ջրերում՝ փորձելով մտնել Իսրայելի տարածք։
