26.06.2026 | 13:31
Քաղաքացին Նիկոլ Փաշինյանի էլ-փոստին ընտրակաշառք տալու առաջարկ է ուղարկել. նախաձեռնվել է քրեական վարույթ
Հունգարիան կրկին հետաձգել է ՆԱՏՕ-ին անդամակցության Շվեդիայի հայտի քննարկումը
Քաղաքականություն
16.11.2023 | 15:29
Հունգարիայի խորհրդարանը դեռևս պատրաստ չէ վավերացնել ՆԱՏՕ-ին անդամակցելու Շվեդիայի դիմումը, այս հարցը խորհրդարանի հաջորդ նստաշրջանի օրակարգում չկա՝ չնայած նախկինում հնչած հավաստիացումներին։ Այս մասին հայտարարել է պատգամավոր Ագնես Վադայը, գրում է Euractiv-ը։
Նշվում է, որ մեկուկես տարի է անցել այն օրվանից, երբ Շվեդիան դիմել է ՆԱՏՕ-ին, և խնդիրներ են առաջացել Թուրքիայի ու Հունգարիայի կողմից հայտի վավերացման հետ կապված։
Ըստ Անկարայի՝ այս հարցում որոշակի առաջընթաց կա. խորհրդարանի արտաքին հարաբերությունների հանձնաժողովը պետք է այսօր քվեարկության դնի այս հարցը, իսկ հետո Թուրքիայի խորհրդարանի վավերացումը կարող է արագ տեղի ունենալ։
Իսկ Հունգարիայի խորհրդարանը հաջորդ շաբաթ հանդիպում կունենա Բուդապեշտում, և այդ հարցն օրակարգում չի լինի, քանի որ խորհրդարանը պատրաստ չէ վավերացնել ՆԱՏՕ-ին անդամակցելու Շվեդիայի հայտը, ասել է պատգամավոր Ագնես Վադայը:
Հիշեցնենք՝ նոյեմբերի սկզբին հաղորդվում էր, որ Թուրքիան չի արագացնի ՆԱՏՕ-ին Շվեդիայի անդամակցության արձանագրության քննարկումը։ Թուրքիայի խորհրդարանը հայտարարել է, որ ՆԱՏՕ-ին Շվեդիայի անդամակցության մասին արձանագրությունը սովորական փաստաթուղթ է, ինչ բոլոր մյուսները, ուստի դրա քննարկումը կիրականացվի հանձնաժողովի ընթացակարգին համապատասխան։
Միաժամանակ, ՆԱՏՕ-ի գլխավոր քարտուղար Յենս Ստոլտենբերգը նշել է, որ Շվեդիան կատարել է բոլոր պայմանները դաշինքին լիիրավ անդամակցության իրավունք ստանալու համար։
