14.12.2024 | 18:16
ՆԳ նախարարը Ոստիկանության անձնակազմի հետ օպերատիվ խորհրդակցություն է անցկացրել
ԱՄՆ Կոնգրեսը հաստատել է ժամանակավոր բյուջեն՝ առանց Ուկրաինային և Իսրայելին օգնության
Քաղաքականություն
16.11.2023 | 16:36
ԱՄՆ Սենատը, հետևելով Ներկայացուցիչների պալատին, ընդունել է կառավարության ժամանակավոր ֆինանսավորման մասին օրինագիծը։ Փաստաթուղթը Ուկրաինային և Իսրայելին օգնության դրույթներ չի պարունակում։ Կոնգրեսը կանխել է կառավարության աշխատանքների կասեցումը, որը կարող էր տեղի ունենալ նոյեմբերի 17-ին:
Փաստաթղթին կողմ է քվեարկել 87 սենատոր, դեմ է եղել 11-ը, հաղորդում է CNN-ը։
Ներկայացուցիչների պալատում այս շաբաթվա սկզբին օրինագծին կողմ էր քվեարկել 336 կոնգրեսական, դեմ՝ 95-ը (մեծ մասը՝ հանրապետականներ): Ամերիկյան լրատվամիջոցների աղբյուրներն ակնկալում են, որ նախագահ Ջո Բայդենը կստորագրի օրինագիծը։
Օրինագիծն առաջարկել է Ներկայացուցիչների պալատի հանրապետական խոսնակ Մայք Ջոնսոնը։ Սկզբում Սպիտակ տունը քննադատել էր նախաձեռնությունը և առաջարկն անվանել «հանրապետականների կողմից է՛լ ավելի մեծ քաոսի բաղադրատոմս»: Այնուամենայնիվ, ավելի ուշ դեմոկրատները ողջունել են ծախսերը 2023 ֆինանսական տարվա մակարդակի վրա պահելը, ինչին դեմ են Հանրապետական կուսակցության պահպանողականները:
Առանձին քննարկվում են Ուկրաինային, Իսրայելին, Թայվանին տրամադրվող օգնության ֆինանսավորման և ԱՄՆ-ի հարավային սահմանի ամրապնդման հարցերը։ Սպիտակ տունն առաջարկել է այդ նպատակների համար հատկացնել 106 մլրդ դոլար (այդ թվում՝ ավելի քան 61 մլրդ դոլար՝ Ուկրաինային)։
Նախագահ Բայդենի վարչակազմը ցանկանում էր, որ այս բոլոր նպատակները ֆինանսավորվեն մեկ փաթեթով, սակայն հանրապետականները դեմ էին դրան:
