Քաղաքականություն
16.11.2023 | 13:16
Չեխիայի կառավարությունը պատժամիջոցների ազգային ցուցակում է ընդգրկել «Գոսզագրանսոբստվեննոստ» դաշնային պետական միասնական ձեռնարկությունը, որը տնօրինում է արտասահմանում ռուսական պետությանը պատկանող անշարժ գույքը: Այս մասին DW-ի ռուսական ծառայության փոխանցմամբ՝ հայտնում է չեխական CTK լրատվական գործակալությունը։
«Գոսզագրանսոբստվեննոստ»-ի՝ Չեխիայում գտնվող բոլոր ակտիվները սառեցվում են, և երկրում այդ ձեռնարկության ցանկացած գործունեություն, այդ թվում՝ անշարժ գույքը վարձակալության տալը, դառնում է անօրինական, բացատրել է Չեխիայի ԱԳ նախարար Յան Լիպավսկին։ Նրա խոսքով, Չեխիայում ռուսներին պատկանող անշարժ գույքի մեծ մասը գտնվում է Պրահայում և Կառլովի Վարիում: Լիպավսկին պարզաբանել է, որ մարդիկ և ընկերությունները, որոնք վարձակալում են այս գույքը, կարող են շարունակել օգտվել դրանից, սակայն վարձավճարը կգնա Ռուսաստանի իշխանությունների համար անհասանելի հաշվեհամարին։
Նախարարը հավելել է, որ Չեխիայի կառավարության որոշումը՝ երկրում ռուսական պետական գույքը սառեցնելու մասին, չի տարածվում ՌԴ դեսպանատան անշարժ գույքի վրա, որն օգտագործվում է դիվանագիտական գործունեության համար։ Խոսքը, մասնավորապես, բուն դեսպանատան շենքի և դեսպանի նստավայրի մասին է։
