ՌԴ-ն դիտարկում է Ինգուշեթիայի տարածքով դեպի Վրաստան նոր երկաթուղու կառուցման հնարավորությունը

Վրաստանի և Ռուսաստանի փորձագիտական շրջանակները սկսել են քննարկել երկրների միջև երկաթուղային հաղորդակցության վերականգնման հնարավորությունը։ Եվ եթե Վրաստանի իշխանությունները չեն դիտարկում Աբխազիայի տարածքով երկաթուղային հաղորդակցության վերականգնումը, ապա Ինգուշեթիայով նոր կովկասյան երկաթուղու կառուցումն ավելի իրատեսական է թվում, գրում է Գրուզիա օնլայնը։

Մոսկվան Ինգուշեթիայի Առևտրաարդյունաբերական պալատին առաջարկել է տարբեր ռազմավարական նախագծեր, որոնցից մեկը կենտրոնական Ռուսաստանից (Հյուսիսկովկասյան երկաթուղու հարևանությամբ) դեպի Հարավային Կովկասի շրջաններ երկկողմանի երկաթուղու կառուցումն է։ Երկաթգիծը պետք է հասնի մինչև Անդրկովկասյան երկաթուղու Քսանի կայարան (Թբիլիսիի մոտ)։

Սա պայմանավորված է Ռուսաստանի դաշնային իշխանությունների պահանջով, որոնք առաջարկել են նախաձեռնել նոր ռազմավարական նախագծեր՝ բարելավելու երկրի բյուջեի եկամուտները և ամրապնդելու արտաքին տնտեսական հարաբերությունները, հատկապես՝ արտաքին պատժամիջոցների համատեքստում:

Մոսկվան որոշել է կրճատել Ռուսաստանի Դաշնության և Վրաստանի միջև ուղևորափոխադրումների և բեռնափոխադրումների երթուղին։ Այս նախագիծը, նրանց կարծիքով, կապահովի «կայուն երկաթուղային հաղորդակցություն» երկու երկրների միջև։

Ինգուշեթիայի Առևտրաարդյունաբերական պալատի (ԱԱՊ) նախաձեռնությունը՝ վերսկսելու երկաթգծի շինարարությունը, նախատեսվում է ներկայացնել և քննարկել ՌԴ ԱԳՆ-ին առընթեր Ռուսաստանի Դաշնության սուբյեկտների ղեկավարների խորհրդի նիստում, որը նախագահում է երկրի արտգործնախարար Սերգեյ Լավրովը։