15.09.2026 | 21:45
Եվրոպան Հայաստանին ցույց տվեց, որ կարող է լինել հուսալի գործընկեր՝ ոչ միայն խոսքով․ Բոգդան Զդրոևսկին՝ ԵԽ-ում քվեարկության մասին
ԱՄՆ Ներկայացուցիչների պալատն ընդունել է ֆինանսների մասին օրինագիծը՝ «շաթդաունը» կանխելու համար
Քաղաքականություն
15.11.2023 | 15:30
ԱՄՆ Կոնգրեսի Ներկայացուցիչների պալատն օրինագիծ է ընդունել երկրի կառավարությանը ֆինանսավորելու ժամանակավոր միջոցների մասին՝ «շաթդաունից» խուսափելու համար, գրում է VOA-ն։
336 ձայն՝ ընդդեմ 95-ի․ ըստ Reuters-ի՝ սա հաղթանակ է Ներկայացուցիչների պալատի խոսնակ Մայք Ջոնսոնի համար, որն իր պաշտոնավարման առաջին անընդմեջ քվեարկությունների ժամանակ բախվել էր իր հանրապետական որոշ գործընկերների հակազդեցությանը:
Ջոնսոնի օրինագիծը մինչև հունվարի 19-ը կերկարաձգի ռազմական շինարարության, տրանսպորտի, բնակարանաշինության, քաղաքաշինության, գյուղատնտեսության, Պարենի և դեղերի վարչության, վետերանների նպաստների և էներգետիկայի ու ջրի ծրագրերի ֆինանսավորումը: Մյուս բոլոր դաշնային գործողությունների, այդ թվում՝ պաշտպանության ֆինանսավորման ժամկետը լրանում է փետրվարի 2-ին:
Այժմ օրինագիծը կուղարկվի Սենատ, որտեղ հաստատման դեպքում փաստաթուղթը կուղարկվի նախագահ Ջո Բայդենին՝ ստորագրման համար։
Եթե ֆինանսավորման օրինագիծը չհամաձայնեցվի և չստորագրվի ժամանակին, դաշնային կառավարության մասնակի «շաթդաուն» տեղի կունենա նոյեմբերի 18-ին, ինչի հետևանքով ավելի քան 4 միլիոն ամերիկացի զինվորական և պետական ծառայողներ աշխատավարձ չեն ստանա, իսկ որոշ պետական ծառայություններ և վճարումներ կարող են սահմանափակվել կամ ուշանալ։
ԱՄՆ Կոնգրեսն այս տարի արդեն երրորդ ֆինանսական դիմակայության մեջ է ամիսներ տևած փակուղուց հետո՝ ավելի քան 31 տրիլիոն դոլարի հասնող ԱՄՆ պարտքի պատճառով, որը դաշնային կառավարությանը հասցրեց դեֆոլտի եզրին: Միջկուսակցական փակուղին ստիպել է Moody’s-ին ուրբաթ օրը իջեցնել ԱՄՆ-ի վարկային վարկանիշի կանխատեսումը կայունից մինչև բացասական, քանի որ բարձր տոկոսադրույքները կշարունակեն բարձրացնել փոխառությունների ծախսերը:
