26.06.2026 | 12:27
ԲՀԿ ներկայացուցիչը միջնորդեց ընտրությունների արդյունքների վիճարկման գործը քննել ՍԴ ամբողջ կազմով․ ՏԵՍԱՆՅՈՒԹ
ԱՄՆ-ի և Չինաստանի ղեկավարները ժամանել են Սան Ֆրանցիսկո՝ բանակցությունների
Քաղաքականություն
15.11.2023 | 13:47
ԱՄՆ նախագահ Ջո Բայդենը և Չինաստանի նախագահ Սի Ցզինպինն այսօր՝ նոյեմբերի 15-ին Սան Ֆրանցիսկոյում անձնական հանդիպում կանցկացնեն, որը կլինի նրանց առաջին քննարկումը վերջին մեկ տարում և տեղի կունենա երկու պետությունների միջև հակասությունների էական սրման շրջանում։ Բանակցությունները տեղի կունենան Ասիա-խաղաղօվկիանոսյան տնտեսական համագործակցության (APEC) գագաթնաժողովի շրջանակում, գրում է DW-ի ռուսական ծառայությունը։
Չինական «Սինհուա» լրատվական գործակալության փոխանցմամբ՝ Չինաստանի առաջնորդն արևմտամերիկյան քաղաք է ժամանել նախորդ երեկոյան։ Նույն օրը Սան Ֆրանցիսկոյում վայրէջք է կատարել Սպիտակ տան ղեկավարի ինքնաթիռը։ Սա Սիի առաջին այցն է Միացյալ Նահանգներ 2017 թվականից ի վեր, երբ նախագահ էր Դոնալդ Թրամփը։
Բացի ԱՄՆ-ից և Չինաստանից՝ APEC գագաթնաժողովին կմասնակցեն ևս 19 երկրների ներկայացուցիչներ։ Մասնակից պետությունների ընդհանուր մասնաբաժինը կազմում է համաշխարհային տնտեսության 60 տոկոսը, նշում է AFP-ն։
Ռուսաստանը գագաթնաժողովում կներկայացնի փոխվարչապետ Ալեքսեյ Օվերչուկը, որը ներառված է Արևմուտքի տարբեր պատժամիջոցների ցուցակներում, այդ թվում՝ Եվրամիության։ Ընդ որում, Օվերչուկը չի գտնվում ԱՄՆ պատժամիջոցների տակ՝ ի տարբերություն Ռուսաստանի Դաշնության բարձրագույն ղեկավարության մեծ մասի։
Ավելի վաղ Ջո Բայդենը հայտարարել էր, որ Միացյալ Նահանգները չի ձգտում հեռանալ Չինաստանից, այլ ցանկանում է բարելավել հարաբերությունները։
