Քաղաքականություն
14.11.2023 | 20:25Մայրաքաղաքի ամանորյա լուսավորությունն ապահովելու համար համայնքային բյուջեից 202 միլիոն 406 հազար դրամ կամ ավելի քան 500 հազար դոլար կծախսվի։ Ծառայությունների մատուցման պայմանագրից տեղեկանում ենք, որ այդ գումարը ծախսվելու է միայն տոնական լուսավորության և հետո դա ապամոնտաժելու համար։ Ընկերությունը պիտի մատուցի 7 կետից բաղկացած հետևյալ ծառայությունները՝ պահեստային տարածքից լուսավորության սարքավորումների դուրսբերում, լվացում, չորացում, տեղադրում, սարքինության ստուգում, սարքավորումների տեղադրման կոնստրուկտորական նախագծերի կազմում, դիզայներական էսքիզային տարբերակների մշակում, լուսավորության սարքավորումների տեղադրման և գործարկման համար անհրաժեշտ ամրակցման, սնուցման և այլ համակարգերի սարքինության ստուգում, անսարք համակարգերի վերանորոգում կամ նոր համակարգերի ներդում և այլն։ Երևանի կենտրոնական փողոցներում զարդարելու աշխատանքներն արդեն մեկնարկել են։
Երևանի քաղաքապետարանը բազմամիլիոնանոց գնումն իրականացրել է առանց մրցույթի «Սինեմարտ» ՍՊԸ-ից, որը քաղաքապետարանին ծառայություններ էր մատուցել նաև անցյալ տարի՝ կրկին ամանորյա լուսավորման ու կրկին մեկ անձից գնման ընթացակարգով։ Ընդ որում, անցյալ տարի ծառայությունը շուրջ 10 մլն-ով պակաս էր արժեցել՝ 191 միլիոն դրամ։
Պետական ֆինանսավորման և կառավարման փորձագետ Արտակ Քյուրումյանը նշում է՝ քաղաքապետարանը սահմանափակել է մրցակցության հնարավորությունը։ Փորձագետն այստեղ կոռուպցիոն ռիսկեր է տեսնում, ընդգծում է՝ պետական գնումների շուրջ 40 տոկոսը կատարվում է մեկ անձից գնման ընթացակարգով։
«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանի կարծիքով էլ՝ մեկ անձից գնումը չի նշանակում, որ կա կոռուպցիա, բայց ցանկացած դեպքում պիտի հիմնավորվի, թե ինչու է գնումն իրականացվել առանց մրցույթի։
Երևանի քաղաքապետարանից հայտնում են՝ պայմանագիրը կնքվել է մեկ անձից գնման եղանակով՝ հիմք ընդունելով ՀՀ կառավարության 2017 թվականի թիվ 526-Ն որոշման 23-րդ կետի 4-րդ ենթակետի 33-րդ տողի իրավակարգավորումը։ Դա սահմանում է մշակութային և (կամ) գեղարվեստաստեղծագործական միջոցառումների (բեմադրությունների, ցուցադրությունների, ցուցահանդեսների, համերգների, փառատոնների, կինոարտադրության, հեռուստահաղորդումների արտադրության) կազմակերպման շրջանակում ապրանքների, աշխատանքների և ծառայությունների ձեռքբերում։
Քաղաքապետարանից այսօր հրաժարվեցին թեմայի առնչությամբ Factor TV-ին մեկնաբանություն տալ։ Խոսնակն ասաց՝ նոյեմբերի 16-ին ասուլիս կհրավիրվի։ «Սինեմարտ» ընկերությունից պարզաբանում են, որ քաղաքապետարանն աշխատանքները վստահել է իրենց՝ հաշվի առնելով բացառիկ փորձը։
«Ինչ վերաբերում է բացառիկությանը, ապա անցած տարվա հաջողված փորձը հաշվի առնելով և նկատի ունենալով, որ այս տարի աշխատանքի ծավալն անգամ գերազանցում է նախորդ Ամանորին ընդառաջ արված աշխատանքը, ընկերությունը չի մերժել քաղաքապետարանի առաջարկը և որոշել է եղած փորձառության հաշվին երևանցիների ու մայրաքաղաքի հյուրերի համար ստանձնել այս պատասխանատու աշխատանքի իրականացումը»,- Factor TV-ի հետ զրույցում ասաց «Սինեմարտ» ընկերության հանրային կապերի պատասխանատու Լևոն Սարդարյանը։
Ըստ իրավաբանական անձանց պետական ռեգիստրի՝ գնումն իրականացրած «Սինեմարտ» ընկերությունը հիմնադրվել է 2008 թվականին, ընկերության 100 տոկոս բաժնեմասը պատկանում է Հանրային հեռուստաընկերության լրատվական ծառայության նախկին պրոդյուսեր, այժմ էլ ռազմավարական ծրագրերի ղեկավար Ռուբեն Շահինյանին։ Ընկերությունն առաջին անգամ պետական գնման մասնակցել է անցյալ տարի, երբ քաղաքապետարանը մեկ անձից գնման ընթացակարգով բազմամիլիոնանոց պայմանագիր էր կնքել։
«Սինեմարտ» ընկերության վրա 2021 թվականին դրված արգելանքը հանվել է 2022-ին քաղաքապետարանի հետ պայմանագրի ստորագրումից օրեր առաջ։ «Սինեմարտ»-ի հանրային կապերի պատասխանատու Լևոն Սարդարյանը, որը, ի դեպ, նախկինում աշխատել է Հանրային հեռուստաընկերությունում և Երևանի քաղաքապետարանի լրատվության վարչության պետի պաշտոնակատարն է եղել, նշում է, որ Ռուբեն Շահինյանն ու քաղաքապետարանի պաշտոնյաները փոխկապակցված չեն, և ընկերությունն ընտրվել է բացառապես հաջողված փորձի համար։
Մանրամասները՝ տեսանյութում։
Արփի Հակոբյան
