Պուտինը ստորագրել է ռազմական դրության ժամանակ նախագահական ընտրությունները հետաձգելու մասին օրենքը

ՌԴ նախագահ Վլադիմիր Պուտինը օրենք է ստորագրել, որը փոխում է ռազմական դրություն մտցնելու դեպքում նախագահական ընտրությունների անցկացման կարգը։ Փաստաթուղթը հրապարակվել է իրավական տեղեկատվության պաշտոնական պորտալում, գրում է The Moscow Times-ը։

Փաստաթղթի համաձայն՝ Կենտրոնական ընտրական հանձնաժողովին իրավունք է տրվում հետաձգել պետության ղեկավարի ընտրությունն այն շրջաններում, որտեղ ռազմական դրություն է գործում, եթե քվեարկությունը «վտանգ է ներկայացնում Ռուսաստանի Դաշնության քաղաքացիների կյանքի և առողջության համար»:

ԿԸՀ-ն կարող է նաև հատուկ ընթացակարգ մտցնել ռազմական դրության ժամանակ ընտրությունների համար և կրճատել քվեարկության ժամանակը։ Հանձնաժողովը պետք է որոշում կայացնի ընտրությունները հետաձգելու կամ անցկացնելու մասին՝ Պաշտպանության նախարարության, ԱԴԾ-ի և այն սուբյեկտի ղեկավարի հետ խորհրդակցելուց հետո, որի տարածքում ռազմական դրություն է մտցվել։

Օրենքը նաև նոր սահմանափակումներ է մտցնում լրատվամիջոցների աշխատողների և ընտրությունների դիտորդների համար: Ընտրատեղամասեր կկարողանան մուտք գործել միայն աշխատանքային պայմանագրով աշխատող լրագրողները, իսկ լուսանկարահանումը և տեսանկարահանումը կթույլատրվի միայն «օրենքով սահմանված կարգով դա անելու իրավունք ունեցող անձանց»։ Լրագրողները զորամասեր մուտք գործելու հնարավորություն կունենան միայն ստորաբաժանման հրամանատարի համաձայնությամբ։

Բացի այդ, Ռուսաստանի Դաշնության տարածքից դուրս գտնվող ընտրատեղամասերում քվեարկության մեկնարկի և ավարտի ժամերը կարող են փոխվել դեսպանատան կամ հյուպատոսության որոշմամբ, եթե նրանք համարեն, որ վտանգ է սպառնում «ՌԴ քաղաքացիների կյանքին և առողջությանը»:

Ավելի վաղ Կրեմլի խոսնակ Դմիտրի Պեսկովը բացատրել էր, որ նախագահական ընտրությունների մասին օրենքում փոփոխություններ են պահանջվում «հատուկ իրավիճակի» պատճառով, այդ թվում՝ Ուկրաինայի անեքսիայի ենթարկված շրջաններում։