23.07.2026 | 23:28
Կապանը` ԱՊՀ 2026 թվականի երիտասարդական մայրաքաղաք
Իսրայելական զորքերը մոտեցել են Ալ-Շիֆայի հիվանդանոցին
Քաղաքականություն
13.11.2023 | 21:23
Իսրայելական զորքերը մոտեցել են Գազայի գլխավոր հիվանդանոցի դարպասներին, որտեղ, ըստ բժիշկների, հիվանդները, այդ թվում՝ նորածինները, մահանում են վառելիքի պակասի պատճառով, փոխանցում է BBC-ի ռուսական ծառայությունը։
Իսրայելի ցամաքային զորքերը հոկտեմբերի վերջին մտել են Գազա և արագորեն շրջապատել քաղաքը: Այդ ժամանակից ի վեր կռիվները կենտրոնացել են անկլավի ամենամեծ հիվանդանոցի՝ Ալ-Շիֆայի շուրջ, որտեղ հազարավոր խաղաղ բնակիչներ են ապաստանել:
Թել Ավիվը պնդում է, որ ՀԱՄԱՍ-ն ունի ստորգետնյա շտաբ թունելներում և ստորգետնյա բունկեր՝ հիվանդանոցի տակ, և զինյալները դիտավորյալ օգտագործում են հիվանդները որպես քող իրենց գործունեության համար: ՀԱՄԱՍ-ը հերքում է մեղադրանքները։
Գազայի՝ ՀԱՄԱՍ-ի կողմից վերահսկվող Առողջապահության նախարարության խոսնակ Աշրաֆ Ալ-Քիդրան, որը Ալ-Շիֆայի հիվանդանոցում էր, հայտնել է, որ այժմ հիվանդանոցի դարպասների մոտ տեղակայված է իսրայելական տանկ:
«Կլինիկայի դարպասի մոտ տանկ կա, ահա թե ինչպիսին է իրավիճակն այսօր»,- Reuters-ին հեռախոսով ասել է Ալ-Քիդրան:
Իսրայելը խաղաղ բնակիչներին հրամայել է լքել հիվանդանոցը, իսկ բժիշկներին հորդորել տարհանել հիվանդներին։ Իսրայելական կողմը հայտարարել է, որ պատրաստ է երեխաներին տարհանել նորածնային բաժանմունքից, իսկ զինվորականները հիվանդանոցի մուտքի մոտ թողել են 300 լիտր վառելիք՝ շտապ օգնության գեներատորները սնուցելու համար, սակայն ՀԱՄԱՍ-ը մերժել է առաջարկը։ Բացի այդ, ըստ իսրայելական բանակի, ՀԱՄԱՍ-ի զինյալները հիվանդանոցի աշխատակիցներին թույլ չեն տվել վերցնել վառելիքը:
Ալ-Քիդրան հերքել է, որ հիվանդանոցը հրաժարվել է վառելիքի մատակարարումից, սակայն պնդում է, որ 300 լիտրը բավական կլիներ կես ժամ աշխատելու համար։ Նրա խոսքով՝ Ալ-Շիֆայի համար օրական 8-10 հազար լիտր վառելիք է պահանջվում։
Իսրայելցի պաշտոնյան անանունության պայմանով հայտնել է, որ 300 լիտրը կարող էր մի քանի ժամվա համար բավականացնել, քանի որ հիվանդանոցում ներկայում գործում է միայն շտապ օգնության բաժանմունքը:
