10.04.2026 | 11:05
«Հայաստան» համահայկական հիմնադրամի բիտումի գնման գործով վերականգնվել է 111.9 մլն դրամ
Ռուսական պետական լրատվամիջոցները հրապարակել, հետո ջնջել են Դնեպրի մոտ զորքերի հետքաշման մասին լուրերը
Քաղաքականություն
13.11.2023 | 20:29
Ռուսական պետական լրատվականները հրապարակել և րոպեների ընթացքում ջնջել են Դնեպրի ձախ ափին ռուսական զորքերի «վերախմբավորման» մասին լուրերը։ Նոյեմբերի 13-ի առավոտյան Telegram-ի ալիքներում և ՌԻԱ Նովոստի ու ՏԱՍՍ լրատվական կայքերում լուրեր էին հայտնվել այն մասին, որ «Դնեպր» զորախումբը կտեղակայվի Դնեպրից արևելք «ավելի շահեկան դիրքերում», այնուհետև երկու գործակալություններն էլ հայտնեցին, որ այդ լուրերը «չեղարկվում են, քանի որ թողարկվել են սխալմամբ», գրում է DW-ի ռուսական ծառայությունը:
«Մենք ներողություն ենք խնդրում մեր բաժանորդներից և ընթերցողներից»,- հայտարարել են ՏԱՍՍ-ից:
Meduza-ն գրում է, որ ջնջված հաղորդագրություններում գործակալությունը հղում է արել ՌԴ Պաշտպանության նախարարությանը, սակայն այդ լուրը չի հրապարակվել ռուսական գերատեսչության Telegram-ալիքում։ Բացի այդ, ՌԴ ՊՆ-ն հերքել է Դնեպրի մոտ հնարավոր նահանջի մասին տեղեկությունները։
«Դնեպրի մարզում զորքերի «վերախմբավորման» մասին կեղծ հաղորդագրություն տարածելը, իբր, ՌԴ ՊՆ մամուլի կենտրոնի անունից, սադրանք է»,- նշել են գերատեսչությունից՝ ի պատասխան RBC-ի հարցման։
DW-ն հիշեցնում է, որ «զորքերն ավելի շահեկան դիրքեր տեղափոխելու մասին» ձևակերպումն ավելի վաղ արդեն օգտագործվել էր ռուսական պաշտոնական աղբյուրների կողմից և նշանակում էր Ուկրաինա ներխուժած ռուսական զինված ուժերի նահանջ։ Մասնավորապես, այսպես են հայտնել ռուսական պետական լրատվամիջոցները 2022 թվականին Խարկովի և Խերսոնի շրջաններում ռուսների նահանջի մասին։
