Ֆրանսիան փոխում է Ուկրաինային սպառազինության մատակարարման մոտեցումները

Ֆրանսիայի իշխանությունները կդադարեցնեն Ուկրաինային զենք մատակարարել իրենց զինանոցներից, որպեսզի Կիևը սկսի զենք գնել ֆրանսիացի արտադրողներից՝ օգտագործելով դրա համար հատուկ հատկացված միջոցները, հայտարարել է երկրի Զինված ուժերի նախարար Սեբաստյան Լըկորնյուն, գրում է The Moscow Times-ը։
«Մենք այժմ բանակցություններ ենք վարում ուկրաինացի գործընկերների հետ, որպեսզի Ուկրաինան գնի նոր հաուբիցներ՝ օգտագործելով հատուկ հիմնադրամի միջոցները, և որպեսզի ֆրանսիացի զինվորականներն այլևս ստիպված չլինեն զենք փոխանցել իրենց զինանոցներից», – ասել է Լըկորնյուն LCI հեռուստաալիքի եթերում:
Նա հիշեցրել է խորհրդարանի վերջերս հրապարակված զեկույցը, ըստ որի՝ Ուկրաինային հատկացվող Ֆրանսիայի ռազմական օգնության չափն արդեն կազմել է 3 միլիարդ եվրո։ Ըստ Լըկորնյուի, բյուջեից 200 միլիոն եվրո է հատկացվել Կիևին աջակցության հատուկ հիմնադրամին։ Ուկրաինան կարող է այդ միջոցները ծախսել նոր զենք գնելու վրա, բայց միայն ֆրանսիացի մատակարարներից։
Լըկորնյուն նաև նշել է, որ Փարիզը կկենտրոնանա Կիևին հակաօդային պաշտպանության սարքավորումներ, այդ թվում՝ մարտական անօդաչու թռչող սարքեր, ինչպես նաև ցամաքային զորքերի համար սարքավորումներ մատակարարելու վրա:

Ֆրանսիան, մասնավորապես, ավելացրել է «Կեսար» ինքնագնաց հաուբիցների արտադրության տեմպերը՝ ամսական երկու միավորից հասցնելով վեց միավորի։ Ընդհանուր առմամբ, Ուկրաինա է տեղափոխվել նման 49 հաուբից՝ 30 ֆրանսիական և 19 դանիական, ասել է երկրի զինված ուժերի նախարարը։