15.09.2026 | 17:06
Ռուբեն Ռուբինյանն ընդունել է Բունդեսթագի պատվիրակությանը
Հանրապետական Թիմ Սքոթը հանել է ԱՄՆ նախագահական ընտրություններին իր թեկնածությունը
Քաղաքականություն
13.11.2023 | 15:00
Հարավային Կարոլինայից հանրապետական սենատոր Թիմ Սքոթը հայտարարել է ԱՄՆ նախագահի ընտրարշավին մասնակցությունը կասեցնելու մասին։ Նրա խոսքով՝ ընտրողները հասկացրել են իրեն, որ այժմ ընտրարշավին մասնակցելու ժամանակը չէ, գրում է Citizen Digital-ը։
«Ես դադարեցնում եմ իմ նախընտրական քարոզարշավը: Կարծում եմ, որ ընտրողները՝ մոլորակի ամենահիասքանչ մարդիկ, իսկապես հստակ ինձ հասկացրել են՝ «Ոչ հիմա, Թի՛մ»: Չեմ կարծում, որ նրանք ասում են՝ ոչ, բայց կարծում եմ, որ նրանք ասում են «հիմա չէ»»,- ասել է Թիմ Սքոթը:
ԱՄՆ նախագահական ընտրությունները տեղի կունենան 2024 թվականի նոյեմբերին։ Հանրապետականների կողմից թեկնածության համար պայքարում են Դոնալդ Թրամփը, Ֆլորիդայի նահանգապետ Ռոն դե Սանտիսը, գործարար Վիվեկ Ռամասվամին, ՄԱԿ-ում ԱՄՆ նախկին մշտական ներկայացուցիչ Նիկի Հեյլին և Նյու Ջերսիի նախկին նահանգապետ Քրիս Քրիստին։ Թրամփը հանրապետականների վարկանիշային աղյուսակում առաջատարն է։
ԱՄՆ նախկին փոխնախագահ Մայք Փենսը, Հյուսիսային Դակոտայի նահանգապետ Դագ Բուրգումը և Արքանզասի նախկին նահանգապետ Ասա Հաթչինսոնն արդեն լքել են նախընտրական պայքարը։
Դեմոկրատական կուսակցությունից կրկին կառաջադրվի գործող նախագահ Ջո Բայդենը։
