Քաղաքականություն
08.11.2023 | 16:59
Իսրայելը մտադիր չէ կրկին գրավել Գազայի հատվածը։ Այս մասին ամերիկյան MSNBC հեռուստաալիքին տված հարցազրույցում ասել է Իսրայելի ռազմավարական գործերի նախարար Ռոն Դերմերը, փոխանցում է DW-ի ռուսական ծառայությունը։
Նա, սակայն, նշել է, որ երբ ՀԱՄԱՍ խմբավորումը իշխանությունից հեռացվի և նրա ենթակառուցվածքները ոչնչացվեն, Իսրայելը «անորոշ ժամանակով» կրելու է այդ հատվածի «անվտանգության ընդհանուր պատասխանատվությունը»։
Նախարարը նաև ասել է, որ եթե «պաղեստինյան ուժերը» կառավարեն Գազան՝ «ի շահ նրա բնակիչների և չցանկանան ոչնչացնել Իսրայելը», ապա դա կարող է քննարկվել։ Միաժամանակ, Դերմերն ընդգծել է, որ հարցը, թե կոնկրետ ինչպես կարելի է դա անել, բաց է մնում։ Սակայն խոսքը չի գնալու Իսրայելի կողմից անկլավի օկուպացիայի մասին։
Ավելի վաղ ԱՄՆ Պետքարտուղարության խոսնակ Վեդանտ Պատելը դեմ էր արտահայտվել Իսրայելի կողմից Գազայի հատվածի օկուպացմանը։
«Ընդհանուր առմամբ, մենք չենք աջակցում Գազայի հատվածի վերաօկուպացմանը, ինչպես նաև Իսրայելը»,- ասել էր Պատելը՝ նշելով, որ Վաշինգտոնը կարծում է, որ «Գազայի հատվածը կա և կմնա պաղեստինյան հող»։
Գազայի հատվածից Իսրայելն իր զորքերը դուրս է բերել 2005 թվականին, մեկ տարի անց էլ այնտեղ իշխանության են եկել ՀԱՄԱՍ-ը։ Նշենք, որ Մերձավոր Արևելքում հակամարտության նոր սրացումը սկսվեց հոկտեմբերի 7-ին, երբ ՀԱՄԱՍ-ը հարձակվել էր Իսրայելի վրա։
Էմմա Չոբանյան
