Քաղաքականություն
08.11.2023 | 14:16
ԱՄՆ Սենատը նախօրեին արգելափակել է 14,3 միլիարդ դոլար հատկացնելու օրինագիծը՝ ՀԱՄԱՍ կազմակերպության դեմ պայքարում Իսրայելին օգնելու համար՝ առանց Ուկրաինային միաժամանակյա աջակցություն տրամադրելու, գրում է DW-ի ռուսական ծառայությունը:
Նոյեմբերի 2-ին այն ընդունվել էր Ներկայացուցիչների պալատի կողմից, որտեղ մեծամասնություն ունեն հանրապետականները, սակայն քվեարկությունը չէր անցել ԱՄՆ Կոնգրեսի վերին պալատում, որտեղ առավելություն ունեն դեմոկրատները։
Եթե Սենատն ընդուներ օրինագիծը, ապա կփոխանցվեր նախագահ Ջո Բայդենի ստորագրությանը, սակայն Սպիտակ տունն ավելի վաղ նախազգուշացրել էր, որ նախագահը վետո կդնի և կհրաժարվի փաստաթուղթը ստորագրելուց։
Օրինագիծն առաջին անգամ Ներկայացուցիչների պալատի հանրապետականների կողմից ներկայացվել էր հոկտեմբերի 30-ին, այն առաջին խոշոր օրենսդրական նախաձեռնությունն է Ներկայացուցիչների պալատի նոր խոսնակ Մայք Ջոնսոնի օրոք: Փաստաթուղթը ենթադրում էր օգնություն միայն Իսրայելին, որն արժանացել է սենատորների քննադատությանը։
Էմմա Չոբանյան
